MAZMUR 80 - KITTA KAREBA MADECENG

Sempajang untu' asalamakenna umma'é

¹ Untu' pamimping kor. Situru lagunna: Bunga Bakungngé. Mazmur asabbiyanna Asaf.

² Oh Pakkampina Israélié, éngkalingai, Iko pimpingngéngngi wija-wijanna Yusuf selaku makkonrongeng. Iko iya makkarungngé ri yasé'na kérub-é, alluruno sibawa mattappa

³ ri yolona Efraim, Bényamin sibawa Manasyé. Ajjellokenni akuwasam-Mu lao ri idi, sibawa poléno passalama'ki.

⁴ Oh Allataala, pajjappaki; itaki sibawa ati masémpo, natasalama matu.

⁵ Oh Puwang Allataala Iya Pommakuwasaé, gangka kégi-Ko macai, namuni madosai umma'-Mu?

⁶ Muwérékki teri untu' inanré, uwai mata maona untu' énungeng.

⁷ Muleppessangngi bangsa-bangsa sideppéta, massasa passalenna tanata macawai masennang sining balitta.

⁸ Oh Allataala Iya Pommakuwasaé, palisuki; itaki sibawa masémpo ati, natasalama.

⁹ Umma'-Mu padai pong anggoro'é iya Mupalétté'é polé ri Maséré. Mupaddésu'i bangsa-bangsa laingngé, nainappa Mutaneng iyaro ajué ri wanuwanna mennang.

¹⁰ Mupassadiyangengngi tana aléna; namakkure maliyung sibawa mallebbang ri sininna wanuwaé.

¹¹ Nacinaungiwi sining bulu-bulué, enrengngé nasibawang takké-takkéna natongkoi ajukajung aras battowaé.

¹² Lorong takkéna lettu ri Tasi Tengngaé, colli'-colli'na lettu ri Salo Efrat.

¹³ Oh Allataala magi Muruttungngi sappona, angkanna tungke tau laloé naulléi céppui buwana?

¹⁴ Nakanyumpéi bawi ale'é angkanna masolang, sibawa olokolo ri padangngé manréi.

¹⁵ Oh Allataala Iya Pommakuwasaé, poléni paimeng, itani polé ri surugaé sibawa jampangiwi umma'-Mu.

¹⁶ Passalama'i umma iya padaé pong anggoro alé-Mu pura tanengngi, sibawa cura' anggoro iya Mupancajiyé mawatang.

¹⁷ Balié pura tubbangngi sibawa tunui; leppessanni mennang ripaccappu ri cai-Mu.

¹⁸ Linrungiwi tau iya puraé Mupilé, ana'na tolinoé iya Mupéwatangiyé untu' alé-Mu.

¹⁹ Nadé'na taléssé polé ri alé-Mu; jagaiwi atuwotta, natapoji-Ko matu.

²⁰ Oh Puwang Allataala Iya Pommakuwasaé, pajjappaki, itaki sibawa masémpo ati, kuwammengngi natasalama.