MAZMUR 79 - KITTA KAREBA MADECENG

Sempajang méllau aleppekeng bangsa

¹ Mazmurna Asaf. Oh Allataala, bangsa iya dé'é naissek-Ko natudangini tana mana-Mu. Napanajisii mennang Bola-Mu, napancajiwi Yérusalém ruttungeng.

² Nasalaiwi mennang ujuna ata-atam-Mu mancaji inanréna manu'-manu'é ri yelle'é. Ujuna sining Muwamaséiyé naleppessangngi mennang mancaji inanréna olokolo liyaé.

³ Ri sininna kota Yérusalém tattuppa'i darana mennang pada-pada uwai; dé'gaga kuburu'i mennang.

⁴ Mancajiki akkéllé-kéllékenna bangsa-bangsa sideppéta, nacawa-cawaiki mennang sibawa nabuwé'ki.

⁵ Oh Puwang, untu' mannennungegga macai-Ko, sibawa angémpurum-Mu malluwa pada-pada apié?

⁶ Tuppa'i cai-Mu ri yasé'na bangsa-bangsaé iya dé'é naissek-Ko, sibawa ri yasé'na akkarungeng-akkarungengngé iya dé'é nassompa lao ri Iko.

⁷ Saba' purani mennang napaccappu umma'-Mu, sibawa mancuru'i onrong naonroiyé mennang.

⁸ Aja' tahukkukki nasaba dosana toriyolota. Amaséini masitta, saba' pettu paddennuwanni.

⁹ Tulukki oh Allataala, Pappassalama'ta, addampengengngi dosa-dosata sibawa paleppe'ki nasaba alebbirem-Mu muto.

¹⁰ Aja' taleppessangngi bangsa laingngé makkutana passaletta, “Kégai Allataalana mennang?” Leppessakki mitai pakkabale'é lao ri bangsa-bangsa iya mpunoéngngi ata-atam-Mu.

¹¹ Engkalingai addarékénna sining tahanangngé; tennapodo sining tau iya ripattentué untu' maté rileppessang tuwo nasaba akuwasam-Mu.

¹² Oh Puwang, wale'i bangsa-bangsaéro leppi wékkapitu nasaba sininna pappakatunana mennang lao ri Iko.

¹³ Na idi umma'-Mu, bimbala Muampié, sukkuru matu lao ri Iko untu' mannennungeng, sibawa poji-Ko massossoreng.