MAZMUR 78 - KITTA KAREBA MADECENG

Allataala sibawa umma'-Na

¹ Elong pappagguruwanna Asaf. Nasibawang pappagguruwakku, éh bangsaku, pénessaiwi ada-adakku.

² Maéloka powada warékkada sibawa pakkalarapangeng, sibawa pakatajangngi patteppungngé wettu riyolo,

³ gau'-gau' iya riyéngkalingaé sibawa ritarimaé, iya nacuritaé néné-nénéta.

⁴ Dé' tamaélo rahasiyakangngi lao ri ana'-ana'ta; maéloki mabbirittangngi lao ri abbatireng ri monrié passalenna akuwasanna Puwangnge sibawa sining winru-Na iya battowaé, enrengngé sining pangkauken-Na iya makalallaingngé.

⁵ Lao ri bangsa Israélié Nabbéréyangngi hukkun-Na, sibawa lao ri wija-wijanna Yakub parénta-Na. Nasuroi néné-nénéta mappagguruwangngi lao ri ana'-ana'na mennang,

⁶ kuwammengngi abbatireng rappina naissengngi, nainappa patterui lao ri ana'-ana'na mennang.

⁷ Nanallalengi towi mennang nataroi matu paddennuwanna ri Allataala, sibawa dé' nallupaiwi pangkauken-Na, iyakiya tuli tunru'i ri parénta-Na,

⁸ kuwammengngi mennang dé' napada néné-nénéna iya pojiyéngngi maronta sibawa madoraka; abbatireng iya kaléwa'-léwa'é teppe'na, sibawa dé' namatinulu lao ri Allataala.

⁹ Suku Efraim iya massenjataé pana, lariwi ri wettunna mammusu.

¹⁰ Najjalékkaiwi mennang assijancin-Na sibawa Allataala, sibawa dé' namaélo tunru lao ri hukkun-Na.

¹¹ Nallupaiwi mennang sining pangkauken-Na, sibawa sining anu makalallaing iya Nappaitangngé lao ri mennang.

¹² Ri yolona toriyolona, mébbui Allataala anu makalallaing ri wanuwa Maséré, ri tanéténa Zoan.

¹³ Napuwé'i tasi'é, nainappa mallétto mennang; Napatettongngi uwai pada-pada téppo'é.

¹⁴ Nadulungngi mennang sibawa ellung ri essoé enrengngé nasibawang tajanna apié puppu benni.

¹⁵ Napuwé'i bulu batué ri padang kessi'é, nenniya paénungngi mennang sibawa maona.

¹⁶ Nasuroi passu uwai bulu-bulu batué, namassolo'na uwai pada-pada saloé.

¹⁷ Iyakiya matterui mennang madosa lao ri Allataala, maronta'i mennang ri padang kessi'é lao ri Iya Pommatanré.

¹⁸ Nattungkai mennang cobaiwi Allataala, ri laleng tuntu'i inanré iya nacinnaiyé mennang.

¹⁹ Naéwai mennang Allataala sibawa makkeda, “Naulléga Allataala mpérékki inanré ri padang kessi'é?

²⁰ Mémeng Naunrui bulu batu iya matedde'é, angkanna massolo uwai sibawa maraja. Iyakiya Naullétoga passadiya roti sibawa mabbéré juku lao ri umma'-Na?”

²¹ Naéngkalinganaro, macaini Allataala nanagasai umma'-Na sibawa api; cai-Na lao ri mennang pédé mancajiwi,

²² saba' dé' mennang namateppe lao ri Allataala, ri akuwasan-Na iya mullééngngi passalama'i mennang.

²³ Namuni makkuwaro Naparéntangngi langié untu' timpa'i sining tange'na.

²⁴ Napanonnoi gandongngé polé ri surugaé, manna untu' inanréna mennang.

²⁵ Nawéréngngi mennang inanré maona; manréi mennang roti malaéka'.

²⁶ Nasuro towi anging alaué mangiri; nasaba akuwasan-Na namangiri anging yattangngé.

²⁷ Napanonnoi manu'-manu'é untu' umma'-Na, jumellana padai kessi'é tenribilang.

²⁸ Napasempéi iyaro sining manu'-manu'é ri akkémangngé ri mattulilinna onrong naonroiyé mennang.

²⁹ Namanréna mennang gangka messo, saba' Allataala pura mpéréngngi mennang aga iya nacinnaiyé.

³⁰ Iyakiya napessunna mennang dé'topa nacau; jaji wettunna mennang manré mupi,

³¹ macaini Allataala Nanaéwai mennang; Naunoi sining tau Israél iya maloloé sibawa baranié.

³² Namuni makkuwaro tette'i umma'-Na madosa, sining anu makalallain-Na dé' naébbui mennang mateppe.

³³ Nanapaccappa'ni Allataala atuwonna mennang pada-pada nappase'é, cappui taut-taunna mennang ri laleng taué.

³⁴ Sises-siseng nauno Allataala siyagangngaré ri yelle'na mennang, iya laingngé massessekaléi sibawa lisu ri Aléna.

³⁵ Naéngngerangngi mennang makkedaé Allataala pallinrunna mennang, sibawa Iya Pommatanré pappassalama'na mennang.

³⁶ Iyakiya ribelléi Aléna ri mennang, ada-adanna mennang bellé simata.

³⁷ Dé' mennang namatinulu lao ri Aléna sibawa dé' nakkatenning ri assijancin-Na.

³⁸ Iyakiya Allataala mamaséiwi sibawa maddampengengngi umma'-Na, sibawa dé' napaccappui mennang. Makkolik-kolinni natahang cai-Na, sibawa dé' napallessui cai-Na.

³⁹ Engngerangngi makkedaé mennang banna mahlu' iya dé'é namannennungeng, pada-pada anging labe'é nadé'na nalisu.

⁴⁰ Temmaka léwe'nana mennang maronta lao ri Aléna, sibawa peddiriwi atin-Na wettunna ri padang kessi'é.

⁴¹ Makkolik-kolinni mennang cobaiwi Allataala, sussaiwi Iya Mapaccingngé, Allataalana Israélié.

⁴² Dé' mennang naéngngerangngi matu akuwasan-Na, ri esso Napaleppe'na mennang polé ri balié,

⁴³ wettunna mébbu sining anu dé'é padanna ri Maséré, sibawa sining anu makalallaingngé ri padang Zoan.

⁴⁴ Napinrai sining salona mennang mancaji dara, angkanna dé' naulléi mennang ménungngi uwaina.

⁴⁵ Nasissai mennang sibawa lale iya maégaé, sibawa leppessangngi tanana mennang risolangi ri cuppangngé.

⁴⁶ Papoléi ule sibawa incalé, iya paccappuéngngi éngngalangngé sibawa wassélé dare'é.

⁴⁷ Nasolangiwi pong anggoro'na mennang sibawa bosi batu, nenniya sining pong arana mennang sibawa cinoddo mattékké.

⁴⁸ Naleppessangngi bosi ése'é kennai olokolo'na mennang, sibawa letté kennai olokolo'na mennang.

⁴⁹ Napallessui cai-Na iya malluwa'-luwa'é ri laleng nasurona sipasukang malaéka' amaténgngé iya mébbuéngngi mennang pettu paddennuwang.

⁵⁰ Dé' natahangngi cai-Na iyaré'ga nacarinnaiwi atuwonna mennang, iyakiya napaccappui mennang sibawa sai.

⁵¹ Naunoi ana' worowané macowaé ri laleng tungke kaluwargana tau Maséré'é.

⁵² Nainappa napimping umma'-Na pada-pada bimbala makkonrongngé, sibawa dulungngi mennang molai padang kessi'é.

⁵³ Ri laleng pappimpin-Na amangngi mennang sibawa dé' namétau, na balinna mennang tallemme'i ri laleng tasi'é.

⁵⁴ Nainappa natiwi umma'-Na ri tana-Na iya mapaccingngé, ri bulué iya Aléna muto sittaiwi.

⁵⁵ Ri yolona umma'-Na Napaddésu'i pabbanuwaé kuwaro Nainappa nattawa-tawang iyaro wanuwaé lao ri sininna suku bangsa Israélié, umma'-Na, angkanna naulléi mennang monroiwi kéma-kémana balié.

⁵⁶ Iyakiya maronta'i mennang sibawa mojiwi Allataala Iya Pommatanré, parénta-parénta-Na dé' mennang naturusiwi.

⁵⁷ Bali'bellai mennang pada-pada toriyolona, sibawa dé' nawedding riyatepperi pada-pada uso mabbéngko'é.

⁵⁸ Naéwai mennang Allataala sibawa onrong assompang barahalana mennang, nenniya mébbui mennang mangémpuru sibawa dato'-dato'na mennang.

⁵⁹ Naitanaro, macai senna'ni Allataala, sibawa sampéyangngi mennang.

⁶⁰ Nasalaiwi kéma-Na mennang ri Silo, onrong Naonroiyé ri yelle'na tolinoé.

⁶¹ Naleppessangngi Petti Assijancin-Na ritawang; lambang alebbiren-Na nasittaiwi balié.

⁶² Macayii lao ri umma'-Na, appunnangeng mana-Na, sibawa leppessangngi mennang riyuno sibawa peddang.

⁶³ Kallolo-kallolona mennang nanréi api; dé'na gaga kawingiwi ana'-ana'darana mennang.

⁶⁴ Imang-ngimanna mennang riyunoi sibawa peddang, janda-jandana mennang dé' naulléi mpating.

⁶⁵ Moto'i Puwangnge pada-pada tau péseddingngé, pada-pada tau mawatangngé purana ménung anggoro.

⁶⁶ Napasoroi balin-Na, sibawa caui mennang untu' mannennungeng.

⁶⁷ Iyakiya Nasampéyangngi wija-wijanna Yusuf sibawa dé' napiléi suku Efraim.

⁶⁸ Iya Napilé iyanaritu suku Yéhuda, sibawa Bulu Sion iya Napojiyé.

⁶⁹ Napatettongngi Bola-Na pada-pada Naonroiyé ri surugaé, sibawa pada-pada linoé, masse untu' mannennungeng.

⁷⁰ Napiléi Daud atan-Na, sibawa malai polé ri olokolo makkonronna,

⁷¹ polé ri onron-Na mappiyara indo' bimbala, untu' mampii Israélié umma'-Na.

⁷² Daud piyarai mennang sibawa macenning atinna, nenniya pimpingngi mennang sibawa macca.