MAZMUR 77 - KITTA KAREBA MADECENG

Passaléwo ri wettu asussangngé

¹ Untu' pamimping kor. Situru: Yédutun. Mazmurna Asaf.

² Mangobbika sibawa macenno lao ri Allataala; mangobbika sibawa macenno, nanaéngkalingaka.

³ Ri wettu aperisengngé massempajakka lao ri Puwangnge; puppu benni uwakkai limakku lao ri Aléna dé' ucau, iyakiya atikku dé' namaélo risaléwori.

⁴ Rékko uwéngngerangngi Allataala, maddarékéka, rékko unennungngi, pédé malemmai atikku.

⁵ Naébbuka Puwangnge dé' naweddikka matinro ri wennié, mauséka angkakku dé' uwulléi mabbicara.

⁶ Upikkiri'i esso-esso iya labe'é, uwéngngerangngi sibawa unennungngi taut-taung iya labe'é.

⁷ Ri wennié upikkiri'-pikkiri'i, sibawa makkutana ri laleng ati,

⁸ “Untu' mannennungegga Puwangnge massampéyang sibawa dé' namaélona?

⁹ Mappésauniga mamaséiki? Dé'ga Narupaiwi jancin-Na paimeng?

¹⁰ Nallupainiga Allataala untu' mamasé? Macayiiga, angkanna dé' namaressé babuwana?”

¹¹ Naumakkeda, “Iyanaé peddiriwi atikku, makkedaé Iya Pommatanré dé'na namakuwasana.”

¹² Maéloka méngngerangngi sining pangkaukem-Mu Puwang, makkatenningngi sining anu makalallaim-Mu wettu riyolo.

¹³ Maéloka nennungngi sininna iya Mupogau'é, sibawa pikkiri'i sining winru-Mu iya maseroé.

¹⁴ Oh Allataala, mapaccing maneng pangkaukem-Mu, nigana silloppo Allataalata?

¹⁵ Iko ritu Allataala iya pogau'é anu makalallaing, purani Mupannessa akuwasam-Mu ri yelle'na bangsa-bangsaé.

¹⁶ Nasibawang awatangem-Mu Mupaleppe'i umma'-Mu, wija-wijanna Yakub sibawa Yusuf.

¹⁷ Naita-Mu, oh Allataala, métaui uwai, ténré towi borina tasi'é.

¹⁸ Tiri'i bosi ellungngé, maddalenrung guttué; siyanré-anré letté ri sininna sulapa'é.

¹⁹ Maddalenrung guttué, reppe billa'é, taggottang linoé sibawa ténré.

²⁰ Joppa-Ko molai bombangngé, léttoi tasi'é, iyakiya dé' napaita batéla-Mu.

²¹ Pada-pada-Ko pakkampié dulungngi umma'-Mu, naolai Musa sibawa Harun.