MAZMUR 73 - KITTA KAREBA MADECENG

KITTA MATELLUE: MAZMUR 73–89 Adélékenna Puwangnge

¹ Mazmurna Asaf. Makessing tongengngi Allataala lao ri umma'-Na, lao ri tau iya mapaccingngé atinna.

² Iyakiya iyya bata-batana, céddé'ni teddéng atepperekku,

³ saba' mangémpuruka lao ri tau matempoé, wettunna uwita amaupekenna tau majaé.

⁴ Saba' dé' mennang namanrasa-rasa mapeddi, watakkaléna mennang mawatangngi namadising.

⁵ Dé' mennang natanggung asussang, dé' nakennai abala pada-pada tau laingngé.

⁶ Rimakkuwannanaro kédo matempoi mennang, sibawa tuli tinda'i sibawa ateddekeng.

⁷ Polé ri atinna mennang tattuppa'i jaé; malippui mennang sibawa rancana-rancana maja.

⁸ Mangéllé'i mennang sibawa makkeda-kedai, nanasibawang atempong mangancangngi maélo patenre.

⁹ Nacurupiyangiwi mennang Allataala ri surugaé, sibawa mabboro lao risining tauwé ri linoé,

¹⁰ angkanna muwi umma'na Allataala balé' towi lao ri mennang, sibawa mateppe lao ri bicaranna mennang.

¹¹ Adanna mennang, “Dé' naissengngi Allataala, Iya Pommatanré dé' najeppuiwi.”

¹² Makkuwaniro keadaanna tau majaé; tuwono sibawa tennang, tattambai matteru waramparanna.

¹³ Paracuma bawang ujagai mapaccing atikku; dé'na gaga akkégunaku mabélaiwi dosaé.

¹⁴ Saba' puppu esso nakennaka abala; tungke élé risissaka.

¹⁵ Akkalarapanna makkeda makkuwaka'ro, ubali'bellariwi assossorenna ana'-ana'mu.

¹⁶ Iyakiya wettukku makkuraga untu' majeppuiwi, iyaro gau'é mawatang senna untu' aléku.

¹⁷ Angkanna muttama'ka ri Bolana Puwangnge, nainappa uwajeppui accappurenna tau majaé.

¹⁸ Mutaroi mennang ri laleng iya malengngoé, sibawa Muleppesangngi mennang menrung binasa.

¹⁹ Ri laleng sikédé mata ancuru'i mennang, masero senna accappurenna.

²⁰ Pada-pada nippi iya teddéngngé ri éléé; wettum-Mu tokkong, oh Puwang, lennye toni mennang.

²¹ Wettukku massessekalé sibawa atikku pada-pada ritoddo'é,

²² madonggoka sibawa dé' uwajeppuiwi, pada-padaka olokolo'é ri yolo-Mu.

²³ Iyakiya tette'ka ri seddé-Mu, Muwakkatenningngi lima ataukku.

²⁴ Mupimpikka sibawa pangaja, sibawa Mutarimaka matti sibawa alebbireng.

²⁵ Niga uwappunnai ri surugaé sangadinna Iko? Ri lainnaé Iko dé'na gaga iya uwacinnaiyé ri linoé.

²⁶ Namuni tubu nyawaku mancaji malemmai, Iko ritu awatangekku, oh Allataala; Iko ritu sininna iya uwappunnaiyé untu' mannennungeng.

²⁷ Tau iya salaiyék-Ko macilakai matu, Mupabbinasai tau iya dé'é namatinulu lao ri Iko.

²⁸ Iyakiya untu' aléku makessing tongeng engka ri seddéna Allataala, Puwang Allataala upancaji onrong allinrungekku, kuwammengngi uwulléi mabbirittangngi sininna pangkauken-Na.