MAZMUR 68 - KITTA KAREBA MADECENG

Elong apakalang

¹ Untu' pamimping kor. Mazmurna Daud.

² Tokkongngi Allataala patassiyasiyai balin-Na, tau iya céccééngngi Aléna lariwi polé ri yolo-Na.

³ Allataala paddésu'i mennang lao, pada-pada rumpu iya riseppungngé nateddéng. Pada-pada lilingngé maccolo ri laleng apié, makkuwaniro tau majaé lennye polé ri yolona Allataala.

⁴ Iyakiya tau malempué mariyo-riyoi sibawa marennu, gora-gorai mennang mariyo-riyo ri yolona Allataala.

⁵ Akkélonno lao ri Allataala, pojiwi asen-Na, passadiyangengngi watattana untu' aléna iya tonangiyé ellung. Asenna Puwang – assennang-sennanno ri yolona!

⁶ Allataala iya monroé ri Bola-Na iya mapaccingngé iyanaritu ambo'na ana' béué sibawa méwaiyéngngi sining jandaé.

⁷ Allataala mpéréngngi onrong naonroi tau iya masino-sinoé; napaleppe'i tau ritahangngé angkanna mennang masennang. Iyakiya sining tau iya méwaéngngi Puwangnge harusu'i monro ri tana iya makarossaé.

⁸ Oh Allataala, wettunna Mupimping umma'-Mu joppa molai padang iya marakkoé,

⁹ ténré linoé, tattiri bosié ri yolo-Mu, nasaba apolénna Allataalana Sinai, Allataalana Israélié.

¹⁰ Mupateppai bosié sibawa maona, sibawa palisui tana-Mu iya makarossaé.

¹¹ Nainappa umma'-Mu monro kuwaro; ri laleng akessingem-Mu, oh Allataala, Mupiyarai tau kasiyasié.

¹² Puwangnge mabbéré apettung, nainappa sining makkunraié tiwi karéba:

^13-14 “Sining arungngé sibawa pasukanna larini!” Lariwi mennang pada-pada jangang-jangang iya luttué lao. Sining makkunraié ri bolaé tawa-tawai, péra' sibawa ulaweng iya nasalaiyé. Namuni maéga iya dé'é naccowé mammusu, umma'na Allataala lolongenni apakalang.

¹⁵ Wettunna Iya Pommakuwasaé patassiya-siyai arung-ngarungngé kuwaro, nonnoni saljué polé ri Bulu Salmon.

¹⁶ Bulu Basan iyanaritu bulu iya maseroé, bulu iya maccoppo'é maéga.

¹⁷ Magi napolé ri coppo'mu iya maégaéro makkitako sibawa mangémpuru lao ri Bulu Sion iya napilé Allataala untu' onron-Na? Monroi matu Puwangnge kuwaro untu' mannennungeng.

¹⁸ Nasibawang mappulo sebbu karéta mawatang mallurui Allataala ri yelle'na mennang ri laleng arajan-Na.

¹⁹ Ménré'i Puwangnge ri onrong iya matanré; maéga tawangeng natiwi maccowé. Tarimai pakkasuwiyang polé ri yelle'na tolinoé mala polé ri yelle'na bangsa maronta'é; kuwammengngi naonro silaong Puwang Allataala.

²⁰ Pojiwi Puwangnge, saba' Aléna Allataala iya passalamaékki; polé ri essoé lao ri essoé Naéssangngi tiwita.

²¹ Allataala iyanaritu Puwang iya mappassalama'é, Napaleppe'ki polé ri amaténgngé.

²² Pasti Allataala reppo'i matu ulunna balin-Na, sining tau iya matterué tuwo ri laleng dosaé.

²³ Adanna Puwangnge, “Eh umma'-Ku, Utiwii balimmu polé ri Basan Utiwii mennang lisu polé ri borina tasi'é,

²⁴ kuwammengngi mubissaiwi ajému sibawa darana mennang, nasining asummu lépe'i gangka cau.”

²⁵ Naita manengngi barisi apakalam-Mu, oh Allataala, Allataalaku, Arukku, riyulé lao ri onrong Naonroiyé.

²⁶ Ri yolo joppai sining pakkélongngé, ri munri sining pakkacapié; ri tengnga sining ana'dara pattetté rabanaé; makkuwaiyé élonna mennang:

²⁷ “Pojiwi Allataala ri tengngana addeppungenna umma'-Na, pojiwi Puwangnge, éh sininna wija-wijanna Yakub!”

²⁸ Bényamin, suku kaminang baiccu'é, joppa ri yolo, nainappa mattinro-tinroseng sining tomariyolona Yéhuda ri munrinna sining tomariyolona Zébulon sibawa Naftali.

²⁹ Natuntu'i Allataalamu awatangemmu; oh Allataala, pakkasse'i aga iya puraé Mupogau' untu' idi.

³⁰ Sining arungngé tiwii pakkasuwiyang lao ri Iko ri Bola-Mu ri Yérusalém.

³¹ Gera'i Maséré, iyaro olokolo masekkangngé ri tengngana arasoé. Amparengngi bangsa-bangsaé, iyaro banténg makkonrongngé silaong ana'-ana'na, iya sisullé siléjja' untu' lolongeng péra'. Allataala passara-sarangngi bangsa-bangsa iya pojiyéngngi mammusu.

³² Sining tomarajana Maséré poléi tiwi tembaga; mapperi-periwi tau Sudangngé tiwi pakkasuwiyang ri Allataala.

³³ Akkélongenni Allataala, éh sininng akkarungengngé, puwélonni pappoji-pojiyangngé untu' Puwangnge,

³⁴ untu' aléna iya malléttoiyéngngi bitara mariyoloé. Engkalingai! Mabbicarai Puwangnge, maddaremmengngi saddan-Na sibawa masero.

³⁵ Angakuiwi akuwasan-Na Allataala iya makuwasaiyéngngi Israélié, lettu ri langié akuwasan-Na.

³⁶ Mappabengnga tongeng Allataalata wettunna massu polé ri onrong Naonroiyé. Mabbéréi akuwasang Allataalana Israélié sibawa awatangeng lao ri umma'-Na. Ripojiwi Allataala!