MAZMUR 66 - KITTA KAREBA MADECENG

Elong pappojiyang sibawa sukkuru

¹ Untu' pamimping kor. Séuwa élong. Gora-gorano untu' Allataala, éh sininna linoé!

² Akkélonno sibawa pakarajai asen-Na, pakalebbii Aléna sibawa pappoji-pojiyang.

³ Powadani lao ri Allataala, “Mappabengnga tongeng pangkaukem-Mu! Tunru'i balié ri Iko penno amétaureng, saba' battowa senna akuwasam-Mu.

⁴ Sininna linoé suju' sompa-Ko, makkélongngi mennang pojiwi asem-Mu.”

⁵ Poléni sibawa itani pangkaukenna Allataala, mappabengnga tongeng sining winru-Na ri yelle'na tolinoé!

⁶ Napinrai tasi'é mancaji tana rakko, nalléttoiwi toriyolota sibawa mallaleng. Natamarennu nasaba pangkauken-Na.

⁷ Mapparéntai sibawa barani untu' mannennungeng. Najagaiwi bangsa-bangsaé, kuwammengngi dé' naulléi matempo tau maronta'é lao ri Aléna.

⁸ Pojiwi Allataalata, éh bangsa-bangsa, gorangngi pappojiyammu lao ri Aléna!

⁹ Purani najagai kuwammengngi tette'ki tuwo, sibawa dé' naleppessakki sempé.

¹⁰ Oh Allataala, Iko pura mojiki pada-pada tau patuléngngéngngi péra'é ri laleng apié.

¹¹ Muleppessakki sempé ri laleng siyo-siyoé, sibawa Muwéréngngi tiwi iya matane senna'é.

¹² Muleppessakki riléjja'-léjja' ri balié; malléttoiki lémpe sibawa api. Iyakiya makkekkuwangngé purani Mutiwi ri onrong iya macommo'é.

¹³ Tiwika matu akkarobangeng ritunu ri Bola-Mu sibawa rupaiwi jancikku lao ri Iko,

¹⁴ janci iya upowadaé wettukku ri laleng asussang.

¹⁵ Uwakkasuwiyangengngi ri Iko akkarobangeng ritunué polé ri olokolo ripilé, bémbé bimbala sibawa saping lai, rumpunna mallaso ménré ri langié.

¹⁶ Poléni sibawa éngkalingai, éh sininna tau mateppe'é, ucuritai matu aga napogau' Allataala ri aléku.

¹⁷ Purana gora méllau tulung ri Aléna; makkekkuwangngé upuwélongengngi pappoji-pojiyang untu' Aléna.

¹⁸ Ebara'na masennakka pikkiri'i majaé, pasti dé' namaélo Puwangnge méngkalingai.

¹⁹ Iyakiya Allataala pura méngkalingaka, najampangiwi paréllaukku.

²⁰ Upojiwi Allataala saba' dé' Nasampéyangngi sempajakku, sibawa dé' nappésau mamaséika.