MAZMUR 65 - KITTA KAREBA MADECENG

Pappojiyang sibawa sukkuru

¹ Untu' pamimping kor. Mazmurna Daud. Elong.

² Sipato'ki poji-Ko ri Sion, oh Allataala, sibawa rupaiwi jancitta ri Iko.

³ Saba' Iko ritu tarimai sempajangngé; sininna tauwé poléi ri Iko nasaba madosani.

⁴ Matane senna'i dosa-dosaku untu' alému, iyakiya Muwaddampengiwi.

⁵ Masennangngi tau iya Mupilé, sibawa iya Muwobbié untu' monro ri Bola-Mu. Ripasipoléngekki matu sibawa sininna iya makessingngé ri Bola-Mu, onrom-Mu iya mapaccingngé.

⁶ Mubaliki sibawa mpérékki apakalang, Mupogau'i gau'-gau' makalallaingngé untu' passalama'ki! Iko ritu paddennuwanna sininna bangsaé lettu ri tasi iya mabélaé.

⁷ Nasibawang awatangem-Mu Mupatettongngi sining bulué, untu' majjellokengngi akuwasam-Mu iya poré.

⁸ Mupasoroi memmu'na tasi'é sibawa ajjallo'na bombangngé, sibawa Mupattennangngi arukkanna bangsa-bangsaé.

⁹ Sininna pabbanuwana linoé métau sibawa mappakalebbi mitai sining pangkaukem-Mu iya maseroé. Sininna linoé polé ricappa'na lao ri cappa'na Muwébbui gora-gora marennu.

¹⁰ Iyaro tanaé Mupiyarai sibawa Muwéréngngi bosi, Mupancajiwi macommo angkanna maona wassélé'na. Sining saloé Mulisekiwi uwai gangka penno, Mupassadiyangengngi mennang gandong, mappakkuwaniro Mupassadiyangengngi.

¹¹ Mupakkuwaiwi alo rakkalana sibawa Muricakiwi tékké-tékké tanana. Musommokiwi sibawa bosi, sibawa Mutanggungngi tuwo macommo cura'-cura'na.

¹² Nasaba akessingem-Mu, tungke taung Mupassadiyai éngngalangngé; kégi-Ko lao, engka amaonareng.

¹³ Padang kessi'é pennoi bémbé bimbala, sininna bulu-buluna marennu.

¹⁴ Sining padang wellaé mapparampa'i bimbala, sining lompo'é pennoi sibawa gandong. Gora maneng nenniya makkélong sibawa marennu.