MAZMUR 56 - KITTA KAREBA MADECENG

Ri laleng asussang mamménasa lao ri Allataala

¹ Untu' pamimping kor. Situru lagunna: Jangang-jangang iya mammekkoé, polé ri daéra iya mabélaé. Mazmurna Daud wettunna tau Filistingngé tikkengngi ri Gat.

² Amaséika, oh Allataala, saba' rigasaka, matteru-teruka ritenre risining balikku.

³ Puppu esso riléjja'-léjja'ka ri balikku. Maéga musuka, oh Allataala Iya Pommatanré.

⁴ Wettukku métau, mamménasaka ri alé-Mu.

⁵ Upojiwi Allataala nasaba aga iya Najjanciyangngé; mateppe'ka ri Aléna, nadé' umétau, dé' pakkullénna tolinoé lao ri iyya.

⁶ Puppu esso balié kacauwi parakaraku, matteru-terui mennang makkuraga cilakaika.

⁷ Maddeppu-deppungengngi mennang ri onrong massubbué, jaga-jagaiwi sininna iya upogau'é, sibawa sappa kasempatang untu' mpunoka.

⁸ Engkaga asalamakeng untu' jana mennang? Paccappui mennang ri laleng cai-Mu, oh Allataala!

⁹ Mubilangngi esso-esso solléku, sibawa muwisseng jumellana uwai matakku; dé'ga Mubilangngi?

¹⁰ Ri esso uwangobbirengngé lao ri Iko, ripasoroi matu balié, saba' uwissengngi Allataala rangengekka.

¹¹ Upojiwi Puwang Allataala, nasaba aga iya Najjanciyangngé.

¹² Mateppe'ka ri Aléna, nadé' umétau, dé' pakkullénna tolinoé lao ri iyya.

¹³ Maéloka rupaiwi jancikku lao ri Iko, oh Allataala, sibawa makkasuwiyangeng akkarobangeng sukkuru lao ri Iko.

¹⁴ Saba' Mupaleppe'ka polé ri amaténgngé, Mujagaika kuwammengngi aja' umenrung. Naweddikka tuwo ri laleng allinrungenna Allataala, ri laleng cahaya iya tajangiyéngngi sininna iya tuwoé.