MAZMUR 51 - KITTA KAREBA MADECENG

Sempajang méllau addampeng

¹ Untu' pamimping kor. Mazmur nakarangngé Daud

² purana riyampareng ri Nabi Natan nasaba malawengngi sibawa Batsyéba.

³ Amaséika oh Allataala, nasaba tette'-Ko mamasé, leddani dosaku nasaba paressé babuwa-Mu iya battowaé.

⁴ Bissaini sininna jaku; pépaccingika polé ri dosaku.

⁵ Saba' uwangakuiwi sining asalakku, tuli uwéngngerangngi dosaku.

⁶ Lao ri Iko, lao ri Iko bawang madosaka, sibawa upogau'i aga iya Muwangga'é maja. Nasipato Muhukkukka, adélé'i apettum-Mu.

⁷ Sitongenna, majaka sipongenna rijajiyang, sibawa nakenna dosa sipongenna ri parémmanangngé.

⁸ Mutuntu'i alempureng atié; pennoiwi atikku sibawa Pangissengeng.

⁹ Pépaccingika, naumapaccing matu; bissaika, naulebbi maputé matu naiya ape'é.

¹⁰ Leppessakka méngkalingai karéba mariyo-riyoé, kuwammengngi ati iya Mureppo'éwé gora-gorai paimeng.

¹¹ Pagilinni tappa-Mu polé ri dosa-dosaku, sibawa leddani sininna asalakku.

¹² Pakangkangekka ati iya mapaccingngé ri aléku, oh Allataala, pakabarui batékku sibawa sumange iya sabbara'é.

¹³ Aja' tabbéyakka polé ri yolo-Mu, sibawa aja' muwalai roh-Mu iya mapaccingngé polé ri aléku.

¹⁴ Ebbuka marennu paimeng nasaba asalamakeng polé ri alé-Mu, wérékka ati iya macenningngé untu' matinulu ri Iko.

¹⁵ Nauwappagguruwangngi matu parénta-Mu lao ri tau madosaé, kuwammengngi nalisu mennang ri Iko.

¹⁶ Paleppe'ka polé ri amaténgngé, oh Allataala pappassalama'ku, nanasibawang arennuwang uwabbirittangngi matu adélékem-Mu.

¹⁷ Oh Puwang, tulukka mabbicara, naupoji-poji-Ko matu.

¹⁸ Dé' muwéloriwi akkarobangeng rigéréé; ébara'na makkasuwiyakka akkarobangeng ritunu, dé' Mupojiwi.

¹⁹ Akkarobangeng untu' Allataala iyanaritu ati iya ancuru'é, ati iya tunru'é sibawa toba'é dé' Musampéyangngi.

²⁰ Oh Allataala, ajjellokengngi akessingem-Mu lao ri Sion, patettongngi paimeng témbo'-témbo'na Yérusalém.

²¹ Na-Muwéloriwi matu tarimai akkarobangeng iya sitinajaé, akkarobangeng ritunu sibawa akkarobangeng iya makkalépué saping lai riyakkasuwiyangeng matu ri yasé'na mézba-Mu.