MAZMUR 48 - KITTA KAREBA MADECENG

Sion, Kotana Allataala

¹ Mazmurna appang Korah.

² Maraja tongeng Puwangnge sibawa ripoji senna ri Kotana Allataalata, ri bulu-bulu iya mapaccingngé.

³ Sion, Bulu Allataala maccaloli'i magello kotana Arung Marajaé perennuiwi sininna linoé.

⁴ Monroi Allataala ri laleng sining bénténna, annessana Aléna muto pallinrun-Na.

⁵ Itai, sining arung-ngarungngé maddeppungeng; poléi mennang maélo maggasa.

⁶ Iyakiya naitana iyaro bulu-bulué, tassélenni mennang; méma'ni mennang sibawa lari malippu.

⁷ Kuwaniro mennang ténré métau sibawa mapeddi, pada-pada makkunrai iya maéloé mémmana,

⁸ pada-pada kappala iya ancuru'é ri laleng anginrajaé.

⁹ Pada-pada iya riyéngkalingaé, taitani makkekkuwangngé, ri Kotana Puwang Iya Pommakuwasaé. Iyaro kotaé iyanaritu Kotana Allataalata, naéwaiwi untu' mannennungeng.

¹⁰ Ri laleng Bola-Mu rinennun-nennungngi pammasé-Mu, oh Allataala.

¹¹ Tassebbo'i asem-Mu sibawa ripoji ri sininna linoé, mapparénta-Ko sibawa adélé.

¹² Leppessanni ra'ya' Sion sibawa Yéhuda gora marennu, nasaba Muhukkungngi balinna mennang.

¹³ Attulilingiwi Sion, accennériwi, sibawa bilangngi manarana.

¹⁴ Pénessaiwi témbo'na, paréssai bénténna, kuwammengngi muwulléi curitai lao ri wija-wijammu:

¹⁵ “Aléna ritu Allataala, Allataalata untu' mannennungeng, Napimpingngi matu lettu mannennungeng.”