MAZMUR 46 - KITTA KAREBA MADECENG

Allataala sibawakki sibawa tulukki

¹ Mazmurna appang Korah. Untu' pamimping kor. Nasibawang lagunna Alamot.

² Allataala iyanaritu allinrungeng sibawa awatangetta; tuli sadiyai sibawa paulléi mattulung ri laleng aperisengngé.

³ Nadé' tamétau, namuni taggottangngi linoé, sibawa sining bulué tallemme ri borina tasi'é;

⁴ muwi majjallo tasi'é sibawa mabbombang, sibawa ténré sining bulu-bulué nasaba pakkunruna.

⁵ Engka assolokeng uwai iya parennuiyéngngi Kotana Allataala, onrong naonroiyé Allataala Iya Pommatanré.

⁶ Monroi Allataala kuwaro, nadé' naancuru iyaro kotaé; Natulungngi matu wettunna masiya' éléé.

⁷ Magguttui Allataala, naancuru tassiya-siya linoé; méma'i bangsa-bangsaé, maruttung sining akkarungengngé.

⁸ Puwang Iya Pommakuwasaé sibawakki, Allataalana Yakub linrungiki.

⁹ Laono mai, itani aga iya napogau'é Puwangnge; temmaka mappahéranna winru-Na ri linoé!

¹⁰ Napappajai musué ri sininna linoé, Naancuru'i panaé sibawa bessié, Natunui sining kaliyawo malébué.

¹¹ Adan-Na, “Appésauno mammusu; issenni, Iyya'naé Allataala, maraja-Ka ri yellle'na bangsa-bangsaé, maraja-Ka ri sininna linoé.”

¹² Puwang Iya Pommakuwasaé sibawakki, Allataalana Yakub sibawakki.