MAZMUR 45 - KITTA KAREBA MADECENG

Elong ri pésta abottingenna arungngé

¹ Mazmurna appang Korah. Elong pammasé. Untu' pamimping kor. Situru lagunna: Bunga bakungngé.

² Mpobbo'i ada-ada magelloé polé ri atikku, uwakkasuwiyangengngi élokku lao ri arungngé. Samanna pénana séddié tau macca, sadiyani lilaku powadai warékkadaé.

³ Iko kaminang magello ri yelle'na tolinoé, ada-adammu pennoi akessingeng, rimakkuwannanaro ribarakkakiko ri Allataala untu' mannennungeng.

⁴ Tappii peddammu, éh arung baranié, maraja senna'ko sibawa mattappa!

⁵ Alluruno sibawa barani mattuju ri ataromporengngé méwaiwi atongengengngé sibawa adélékeng iya malemmaé; nasibawang awatangemmu sittaiwi apakalang iya battowaé!

⁶ Panamu iya macéru'é bettui jantunna balimmu, menrungngi bangsa-bangsaé ri yolomu.

⁷ Allataala mpérékko akuwasang untu' mapparénta, mattahangngi akuwasammu untu' mannennungeng; muparéntai sibawa adélé ra'ya'mu.

⁸ Muwéloriwi iya tongengngé sibawa mucéccéi majaé; rimakkuwannanaro, Allataala, Allataalamu pura piléko, sibawa pésennangiko napakacauri arung-ngarung laingngé.

⁹ Pakéyammu mabbau mur, gaharu sibawa cénrana; pacculé musi'é ri saoraja gadingngé mébbuko marennu.

¹⁰ Ri yelle'na sining pattumani saorajaé engkai ana'-ana' makkunrainna arungngé. Ri ataunna kadéra arajangngé tettongngi bainéna sibawa bélo-bélo ulaweng tuléng.

¹¹ Eh Putri, éngkalingai ada-adakku, allupaini bangsamu sibawa sellaomu.

¹² Agelloremmu taré'i atinna arungngé, puwammui, tunru'no ri aléna.

¹³ Pabbanuwana Tirus tiwi pakkasuwiyang untu' alému; makkuragai tau sugié malai atimmu.

¹⁴ Muttama'i Putri arungngé sibawa penno agelloreng, wajunna risulang ulaweng.

¹⁵ Nasibawang pakéyang madduparupang pecco'na ritinrosiwi lao ri arungngé, riyaccowéri risining parawangngé, silao-silaonna, makkuwatoro mennang untu' arungngé.

¹⁶ Gora-gorai mennang sibawa marennu wettunna riantara muttama ri laleng saorajana arungngé!

¹⁷ Iko, arukku, lolongengngi matu maéga ana' worowané untu' tudangiwi kadéra arajanna néné-nénému. Mupancajiwi matu mennang panguwasa ri tompo'na linoé.

¹⁸ Nasibawang iyaé lagué upakalabbako massossoreng napojiko matu bangsa-bangsaé mannennungeng.