MAZMUR 44 - KITTA KAREBA MADECENG

Sempajang méllau allinrungeng

¹ Mazmurna appang Korah. Elong pappagguruwang. Untu' pamimping kor.

² Oh Allataala, aléta muto pura méngkalingai curita iya nacuritaé toriyolota passalenna winru masero iya Mupogau'é ri wettu riyolo.

³ Iko muto paddésu'i bangsa-bangsaé kuwammengngi nattette umma'-Mu ri wanuwanna mennang. Mucilakaiwi bangsa-bangsa laingngé, iyakiya umma'-Mu Muleppessangngi mabbija-bija.

⁴ Iyaro tanaé dé' nasittaiwi sibawa peddang; dé' nasibawangngi awatangeng riyaléna napakala mennang, iyakiya nasibawang akuwasang sibawa cahaya ahadérékem-Mu, saba' Muwéloriwi umma'-Mu.

⁵ Iko ritu Arukku sibawa Allataalaku, iya mabbéré apakalang lao ri umma'-Mu.

⁶ Nasibawang akuwasam-Mu ricaui balitta, sibawa patunru'i sining tau iya gasaékki.

⁷ Saba' dé' uwattuwangngi panaku, muwi peddakku dé'to napassalama'ka matu.

⁸ Iyakiya Iko ritu passalama'ki polé ri balié, sibawa caui sining tau iya céccéékki.

⁹ Na idi matu tuli pakaraja-Ko, sibawa matteru-teru sukkuru lao ri Iko.

¹⁰ Iyakiya makkekkuwangngé Musalaiki sibawa leppessakki ricau. Dé'na Mumalluru silaong barisatta.

¹¹ Muleppessakki lari polé ri balitta, sibawa rampasa'i mennang waramparatta.

¹² Muleppessakki rigérési pada-pada bimbala'é, sibawa Mupassara-sarakki ri yelle'na bangsa-bangsaé.

¹³ Mubalu'i umma'-Mu sibawa dé' nasiyaga ellinna, sibawa dé' aga-aga saro nalolongeng.

¹⁴ Mupancajiki akkéllé-kéllékenna sining balibolaé naéllé'-kéllé'ki mennang sibawa nacawa-cawaiki.

¹⁵ Mupancajiki bahang assindirikenna bangsa-bangsaé; napaccilic-ciling mennang ulunna nanapakatuna tokki.

¹⁶ Puppu esso ricellaka, tanggungngi sirié sibawa ateddéngeng tappa,

¹⁷ nasaba méngkalinga pangéllé sibawa pappakatuna polé ri témunna balié sibawa tau maéloé makkabale.

¹⁸ Iya manennaro purani nakenna namuni idi dé' tallupaiko iyaré'ga bali'bellariwi assijancimmu sibawa idi.

¹⁹ Atitta dé' nassakkarekko; paréntamu dé' tajampaléllériwi.

²⁰ Iyakiya Musalaiki ri laleng pettangngé; dé' pakkullétta ri yelle'na olokolo masekkangngé.

²¹ Akkalarapanna dé'na tasompai Allataala, sangadinna massempajang lao ri déwata laingngé,

²² pasti naisseng matu Allataala, nasaba Nawellungiwi rahasiana atitta.

²³ Nasaba Iko matteruki riyancang ri amaténgngé, sibawa rigaukeng pada-pada bimbala aggérésengngé.

²⁴ Oto'ni, oh Puwang! Magi Mumatinro? Tokkonni! Aja' tasampéyakki untu' mannennungeng.

²⁵ Magi Mumassubbu, sibawa mallupaiwi anrasa-rasatta enrengngé asussatta?

²⁶ Ancuru'ki mabuwang ri tanaé, léwu ri laleng awué nasaba cauki.

²⁷ Tokkonni sibawa poléni tulukki, passalama'ki nasaba pammasé-Mu.