MAZMUR 39 - KITTA KAREBA MADECENG

Angakungenna tau iya mattengngangngé manrasa-rasa

¹ Untu' pamimping kor. Mazmurna Daud. Untu' Yédutun.

² Pikkiri'ku, “Maéloka jagaiwi alé kuwammengngi dé' umadosa sibawa lilaku. Dé' umaélo mabbicara ri wettu macawé'na mupa tau majaé.”

³ Mammekkoka sisebbu basa, angkanna naparogiwi aléku muto. Na anrasa-rasakku pédé matane'i rasana;

⁴ naekké'ka abata-batang iya maseroé. Pédé ripikkiri, pédé masussa atikku; angkanna makkedaka,

⁵ “Puwang, paissengika uppanna ajjalekku kuwammengngi uwissengngi makkuwamani ponco'na atuwokku.”

⁶ Temmaka ponco'na Mupattentu umuru'ku! Untu' alé-Mu wettu atuwokku dé' bettuwanna. Tongeng, tolinoé padai seppung nappase'é bawang,

⁷ labe'i atuwonna pada-pada wajo-wajoé. Sininna alippungenna siya-siyai bawang; nagoppoi waramparangngé, iyakiya dé' naissengngi niga pakéi matu.

⁸ Makkekkuwangngé aga utajeng, oh Puwang? Ri Iko ritu amménasakku.

⁹ Paleppe'ka polé ri sininna dosaku, aja' taleppessakka mancaji akkéllé-kéllékenna tau madonggoé.

¹⁰ Mammekkoka sibawa dé' natattimpa bawaku, saba' Iko ritu majara'ka.

¹¹ Alani pahukkungem-Mu polé ri aléku, saba' céddé'ka maté nasaba pakkunru-Mu.

¹² Tolinoé nasaba asalanna; Muhukkungngi sibawa Muajara' pada-pada cecco'é Muancuru'i aga iya mangke'é ri aléna. Tongeng, tolinoé padai seppung nappase'é bawang.

¹³ Engkalingai sempajakku oh Puwang, pénessai paréllaukku; aja' Muwonro mammekko rékko terika. Pada-pada sininna néné-nénéku, cinampe bawang mappérumaka ri alé-Mu.

¹⁴ Aja' mugangguka, kuwammengngi umasennang céddé, ri wettu dé'napa ulao nadé'na gagana.