MAZMUR 37 - KITTA KAREBA MADECENG

Totona tau majaé sibawa tau makessingngé

¹ Polé ri Daud. Aja' mumausé nasaba tau majaé. Aja' mumangémpuru ati lao ri tau iya pogau'é asalang.

² Saba' masitta'i mennang teddéng pada-pada wellaé, sibawa makelle pada-pada tanet-taneng manyilaé.

³ Ateppe'no lao ri Puwangnge sibawa pogau'ni iya makessingngé, onrono ri wanuwaéro enrengngé kédono sibawa matinulu.

⁴ Sappani asennangemmu ri Puwangnge, Nanasennangiwi matu cinnana atimmu.

⁵ Abbéréyangngi atuwommu lao ri Puwangnge, amménasano ri Aléna, Nanatulukko matu.

⁶ Napannessai matu atinuluremmu pada-pada tajangngé, sibawa atinuluremmu pada-pada lakessoé.

⁷ Tajenni Puwangnge sibawa ati tennang, tajenni sibawa sabbara narapi tinda'. Aja' mumausé nasaba iya maupe'é atuwonna, iyaré'ga iya pogau'é bellé.

⁸ Aja' tamacai sibawa tamapella ati, iyaro banna tiwii acilakang.

⁹ Saba' tau iya pogau'éngngi majaé ripallennye'i matu, iyakiya iya mamménasaé lao ri Puwangnge namanai matu iyaro tanaé.

¹⁰ Lennye'i matu tau majaé sibawa masitta, rékko risappai, dé'ni gaga.

¹¹ Tau iya mariyawa atié nappunnangiwi matu iyaro tanaé, sibawa péneddingiwi acommokang iya maonaé.

¹² Tau majaé narancanai majaé lao ri tau makessingngé, nenniya mitai sibawa paccéccé.

¹³ Iyakiya Puwangnge cawa-cawaiwi tau majaé, saba' Naissenni macawé'ni accappurenna iyaro tauwé.

¹⁴ Narampui peddanna tau majaé sibawa mannémbakeng pana untu' mpunoi tau kasiyasié sibawa manrasa-rasaé, untu' mpunoi tau iya tuwoé makessing.

¹⁵ Iyakiya tau majaé rigajangngi matu ri peddanna muto, ripoloi matu matana.

¹⁶ Céddé barang nappunnangi tau makessingngé lebbi mangke'i naiya amaonarenna tau majaé.

¹⁷ Saba' akuwasanna tau majaé napoloi matu Puwangnge, iyakiya tau makessingngé Nalinrungiwi.

¹⁸ Najagaiwi Puwangnge atuwonna tau malempué, appunnangeng manana mennang tette'i untu' mannennungeng.

¹⁹ Ri wettu aperisengngé dé' matu mennang nanrasa-rasa, ri wettu akkadérengngé dé' matu naakurangeng.

²⁰ Iyakiya tau majaé binasai matu, teddéngngi matu balinna Puwangnge pada-pada bungaé ri padangngé, lennye'i matu ri laleng rumpué.

²¹ Minrengngi tau majaé nadé' napalisui, iyakiya tau makessingngé mabbéréi sibawa makacuwa.

²² Tau iya ribarakkakiyé ri Puwangnge namanai matu iyaro tanaé, iyakiya tau iya Natanroiyé napaddésu'i matu.

²³ Napimpingngi Puwangnge tauwé ri laleng iya harusu'é naola, Napakkasse'i tau iya atuwonnaé Naéloriwi.

²⁴ Rékko menrungngi, dé' namalo maladde, saba' Puwangnge makkatenningngi limanna.

²⁵ Mappammulai maloloku lettu macowa, dé' naengka uwitai tau makessingngé nasalai Puwangnge, iyaré'ga ana' eppona mancaji paréllau sidekka.

²⁶ Tuli mappainrengngi sibawa mabbéré, sibawa ana'-ana'na mancaji barakka'i lao ri aléna.

²⁷ Salaiwi majaé, pogau'i makessingngé, na untu' mannennungeng naonroiwi wija-wijammu iyaro tanaé.

²⁸ Saba' naéloriwi Puwangnge pangkaukeng makessingngé sibawa adélé'é, tau iya matinulué ri Aléna dé' Narileppessang kariya-riya. Nalinrungiwi mennang lettu mannennungeng, iyakiya wija-wijanna tau majaé riyunoi matu.

²⁹ Tau malempué namanai matu iyaro tanaé, sibawa monroiwi untu' mannennungeng.

³⁰ Tau makessingngé mabbicarai sibawa mapanré, tuli malempui ri laleng warékkadanna.

³¹ Hukkunna Allataalana nataroi ri laleng atinna, dé' naléssé polé ri aléna.

³² Tau makessingngé riinti'i ri tau majaé iya sappaé kasempatang untu' mpunoi.

³³ Iyakiya Puwangnge dé' naleppessangngi sempé ri limanna balié, iyaré'ga rihukkung ri wettunna riadéléki.

³⁴ Amménasano lao ri Puwangnge sibawa turusiwi parénta-Na, Nanaakkako untu' manai iyaro tanaé; muwitai matu ripallennye tau majaé.

³⁵ Engka naengka uwita séddi tau maja iya pojiyéngngi mabboro; pada-padai aju iya matakkaé sibawa makkure maliyung.

³⁶ Wettukku lalo, dé'ni gagana, usappai, iyakiya dé'ni ulolongeng.

³⁷ Pénessaiwi tau iya makessingngé sibawa malempu atié; tau iya pojiyéngngi assidaméngengngé mappunnaiwi amménasang ri wettu mangoloé.

³⁸ Iyakiya tau madosaé ripaccappui matu; wija-wijanna mennang ripallennye'i matu.

³⁹ Napassalama'i Puwangnge tau malempué, sibawa linrungiwi mennang ri wettu aperisengngé.

⁴⁰ Natulungngi sibawa napassalama'i mennang, sibawa paleppe'i mennang polé risining tau majaé, saba' mallinrungngi mennang ri Aléna.