MAZMUR 35 - KITTA KAREBA MADECENG

Sempajang méllau pattulung

¹ Mazmurna Daud. Puwang, éwai tau iya méwaékka, musui tau iya musuékka.

² Alani kaliyawo-Mu, namutokkong tulukka.

³ Akkai bessimmu sibawa duru'-Mu untu' méwai tau iya lellungngékka. Powadani lao ri iyya makkedaé Iko pappassalama'ku.

⁴ Leppessangngi tau iya maéloé mpunoka ricau sibawa ripakasiri. Leppessanni tau iya sikongkolo'é méwaka soro sibawa malippu.

⁵ Leppessangngi mennang rilellung ri malaéka'na Puwangnge, pada-pada awang towa nassiyamporengngé anging.

⁶ Leppessangngi mennang rilellung ri malaéka'na Puwangnge ri laleng iya makalemmengngé sibawa malengngo.

⁷ Paracuma mennang napasangika siyo iyaré'ga kali kalebbong untu' tikkekka.

⁸ Leppessangngi mennang nakenna abinasang sibawa tennasenna-senna. Leppessangngi mennang riyala ri siyona muto nanasempé sibawa binasa.

⁹ Naugora-gora nasaba Puwangnge, marennui atikku saba' Napassalama'ka.

¹⁰ Nasibawang ati sukku makkedaka, “Puwang, dé'gaga bandingem-Mu! Mupaleppe'i malemmaé polé ri mawatangngé, iya kasiyasié sibawa manrasa-rasaé polé ri tenreéngngi.”

¹¹ Sabbi-sabbi majaé tokkongngi méwaka, sibawa tenre'ka pogau'i gau'-gau' iya dé'é uwissengngi.

¹² Akessingekku nawale'i mennang sibawa ja; tallemme'ka ri laleng apettupaddenuwangengngé.

¹³ Wettunna mennang malasa, messéka sibawa temmanré; massempajakka sibawa pacannunnui ulué,

¹⁴ pada-pada massempajangengngi séddié silessureng iyaré'ga séddié sahaba maréppé. Tunru'ka teringiwi mennang, samanna mabbarataka untu' indo'ku muto.

¹⁵ Iyakiya wettukku masussa, masennangngi mennang, sibawa makkatulung méwaka. Joppai mennang takképpak-képpang untu' pakatunaka.

¹⁶ Matterui mennang méllékéllé'i séddié tau péso, enrengngé mitaka sibawa paccéccé.

¹⁷ Gangka kégi, oh Puwang, gangka kégi banna makkitako bawang? Passalama'ka polé ri paggasana mennang, paleppe'i nyawaku polé ri singa-singaéro.

¹⁸ Nausukkuru matu lao ri Iko ri tengngana umma'-Mu, sibawa pojiwi asem-Mu di laleng addeppungenna mennang.

¹⁹ Aja' taleppessakka riyacculé-culéi ri tau iya musuékka temmakkésaba'. Aja' muleppessakka rigora-gorai ri tau iya céccéékka temmakkéalasang.

²⁰ Bicaranna mennang dé' namabessa; narancanai mennang pabengnguwangngé lao ri tau iya tuwoé sipammasé-masé.

²¹ Gora-gorai mennang lao ri iyya sibawa makkeda, makkedaé purani mennang naita pangkaukekku.

²² Iyakiya Iko, Puwang, purani muwita; aja' Muwammekko, oh Puwang, aja' tamabéla polé ri aléku.

²³ Tokkonni méwaiwi parakaraku, oh Allataala sibawa Puwak-ku, tulukka!

²⁴ Ewaika, saba' adélé'-Ko, oh Puwang Allataalaku, aja' taleppessangngi balié gora-goraika.

²⁵ Aja' taleppessangngi mennang makkeda ri laleng ati, “Sukkuru'ki, purani ripaccappu nyawana. Ritarimani paréllautta!”

²⁶ Leppessangngi tau iya masennangngé mitai anrasa-rasakku mancaji malippu sibawa masiri. Leppessangngi tau iya mattempowangngéngngi aléna lao ri iyya ripakatuna sibawa ripakasiri.

²⁷ Tennapodo tau iya macinnaé mitaka ripattongengngi gora-gora sibawa marennu. Tennapodo mennang makkolik-kolingngi makkeda, “Maraja tongeng Puwangnge! Nacinnaiwi asalamakenna atan-Na!”

²⁸ Nauwabbirittangngi matu adélékem-Mu, sibawa poji-Ko puppu esso.