MAZMUR 33 - KITTA KAREBA MADECENG

Elong pappojiyang

¹ Eh sining tau malempué, gorano marennu nasaba aga iya puraé napogau' Puwangnge; sipato'i tau malempué mappoji-poji.

² Sukkuru'no lao ri Puwangnge sibawa kacapi, akkélongenni Aléna sibawa naccowéri musi'.

³ Akkélongenni élong baru untu' Puwangnge, acculéyangngi kacapié makessik-kessing nenniya gorano sibawa marennu!

⁴ Sininna ada-adanna Puwangnge wedding riyatepperi; matinului ri laleng sininna pangkauken-Na.

⁵ Naéloriwi alempurengngé sibawa adélékengngé; sininna linoé pennoi sibawa pammasé-Na.

⁶ Mabbéréi parénta Puwangnge, nancaji langié; mata essoé, kétengngé sibawa wéttowingngé ripancajiwi ri ada-adan-Na.

⁷ Napaddeppungengngi sininna uwaina tasi'é riséddié onrong, dolangeng malowangngé Natahangngi ri laleng téppo'é.

⁸ Leppessanni sininna linoé métau lao ri Puwangnge sibawa pabbanuwana linoé pakalebbii Aléna.

⁹ Saba' makkeda-adai, Naripancaji maneng; Namabbéréi parénta, naengka maneng.

¹⁰ Puwangnge teppasipoléngengngi rancanana bangsa-bangsaé, Napaddéi niya'na mennang.

¹¹ Iyakiya rancanana Puwangnge tette'i mattahang, masse'i rancangan-Na sillampé wettué.

¹² Masennangngi bangsa iya mangakuiyéngngi Puwangnge selaku Allataalana, masennangngi umma iya Napilé mancaji appunnangen-Na!

¹³ Polé ri surugaé makkitai Puwangnge liyawa, nanaitai sininna rupatauwé.

¹⁴ Polé ri kadéra arajanna natangngai Puwangnge sininna iya monroiyéngngi linoé.

¹⁵ Aléna ritu mébbui atinna mennang, sibawa missengngi sininna pangkaukenna mennang.

¹⁶ Dé' napakala arungngé nasaba battowana tentarana, dé' nasalama prajuri'é nasaba awatangenna.

¹⁷ Dé' nawedding riyattuwang anyarangngé untu' pakala, awatangenna iya battowaé dé' naulléi mappassalama.

¹⁸ Puwangnge jagaiwi sining tau iya mateppe'é iya maddennuwangngéngngi pammaséna.

¹⁹ Napassalama'i mennang polé ri amaténgngé, sibawa patuwoi mennang ri wettu akkadérengngé.

²⁰ Natamaddennuwang lao ri Puwangnge, aléna ritu pattulung sibawa pangéwaingetta.

²¹ Mariyo-riyoki nasaba Aléna sibawa mateppe lao ri asenna iya mapaccingngé.

²² Tennapodo tette'ki muwamaséi, oh Puwang, saba' mamménasaki lao ri iko.