MAZMUR 32 - KITTA KAREBA MADECENG

Angakungeng sibawa addampengeng

¹ Mazmurna Daud. Elong pappagguruwang. Masennangngi tau iya riyaddampengengngé dosana, sibawa riyaddampengengngé asalanna.

² Masennangngi tau iya dé'é naribilang jana ri Puwangnge, sibawa iya dé'é napojiwi mabbellé.

³ Sipongeng dé'napa uwangakuiwi dosaku, maddoko-rokoka nasaba maddaréké puppu esso.

⁴ Esso wenni Iko natenre'ka, Puwang, cappu awatangekku pada-pada nattemmekiyé tire mata esso.

⁵ Nainappa uwangakui dosaku lao ri Iko, dé'gaga usubbu asalakku. Upettuini untu' mangakuiwi lao ri Iko, sibawa Muwaddampengengngi sininna dosaku.

⁶ Rimakkuwannanaro tungke tau matinulué sitinajai massempajang wettunna péneddingi aperiseng, angkanna rékko poléi lémpe asussangngé, dé' nappo'i.

⁷ Iko ritu onrong assubbungekku, Mupaleppe'ka polé ri asukkarakengngé. Naugora-gora marennu, saba' puraka Mupassalama.

⁸ Adanna Puwangnge, “Ujellokekko matu laleng iya harusu'é uwola, Upimpikko matu sibawa Upangajari.

⁹ Aja' mupada anyarang iya dé'é akkalenna, iya harusu'é ripaturu sibawa galang nenniya tulu kuwammengngi naturu.”

¹⁰ Tau madosaé nakennai maéga anrasa-rasang; iyakiya tau iya mamménasaé lao ri Puwangnge tette'i rilinrungi ri pammasé-Na.

¹¹ Eh sining tau malempué, arennuno sibawa mariyo-riyo nasaba aga iya puraé napogau' Puwangnge. Gorano marennu, éh sininna tau iya malempu atié!