MAZMUR 29 - KITTA KAREBA MADECENG

Saddanna Puwangnge ri laleng anginrajaé

¹ Mazmurna Daud. Pojiwi Puwangnge, éh mahlu'-mahlu' surugaé, pojiwi arajanna sibawa akuwasan-Na.

² Pojiwi asenna Puwang iya malebbié sompai Aléna sibawa paké pakéyang assompang.

³ Allataala iya marajaé magguttui ri tompo'na tasi'é, maddaremmengngi saddan-Na ri tompo'na dolangengngé.

⁴ Riyéngkalingai saddanna Puwangnge, pennoi akuwasang sibawa agaggang.

⁵ Naléttung aju-kajungngé saddanna Puwangnge, napolo aju camara Libanongngé.

⁶ Napaluppe'i Bulu Libanon pada-pada ana' sapingngé. Luppe'-luppu'i Bulu Siryon pada-pada ana' banténgngé.

⁷ Saddanna Puwangnge naébbui billa'é siyanré-anré.

⁸ Saddanna Puwangnge gottangngi padang kessi'é, Puwangnge gottangngi padang kessi Kadés.

⁹ Nagottangngi aju-kajung berangangngé saddanna Puwangnge, sibawa padduttungngi daud-daungngé ri ale'é; na umma'é ri Bolana Puwangnge mangobbii, “Pojiwi Puwangnge!”

¹⁰ Makuwasai Puwangnge ri lémpe rajaé, makuwasai selaku Arung untu' mannennungeng.

¹¹ Tennapodo Puwangnge mabbéré awatangeng lao ri umma'-Na, sibawa mébbui mennang saléwangeng.