MAZMUR 26 - KITTA KAREBA MADECENG

Sempajanna tau iya dé'é napasala

¹ Wérékka adélékeng, oh Puwang, saba' tuwoka sibawa malempu ati. Mamménasaka lao ri Puwangnge, sibawa tebbata-bata muwi céddé.

² Salidikika, oh Puwang, sibawa ojika, paréssai cinnaku sibawa pikkirakku.

³ Tuli uwéngngerangngi matu pammasé-Mu, sibawa tette matinulu lao ri Iko.

⁴ Dé' umaélo maddeppungeng silaong pabbelléngngé, iyaré'ga siwollompollong sibawa tau munapé'é.

⁵ Ucéccé addeppungenna tau iya pogau'éngngi majaé, uniniriwi bangsa majaé.

⁶ Ubissaiwi limakku tanrang teppasala, sibawa joppa mattulilingiwi mézba-Mu, oh Puwang,

⁷ napuwélong towi élong sukkuru'é, sibawa mabbirittangngi pangkaukem-Mu iya mappabengngaé.

⁸ Upojiwi Bola-Mu, oh Puwang, onrom-Mu monro sibawa penno arajang.

⁹ Aja' taunoka silaong tau madosaé, iyaré'ga reddu'i nyawaku silaong tau pappassu daraé.

¹⁰ Matteru-terui mennang pogau'i majaé, sibawa tuli sadiyai tarima pasoso.

¹¹ Iyakiya tuwoka sibawa ati matinulu, amaséika sibawa paleppe'ka.

¹² Na amakka polé ri sininna bahayaé, upojiwi matu Puwangnge ri laleng addeppungenna umma'-Na.