MAZMUR 25 - KITTA KAREBA MADECENG

Sempajang méllau pappimping sibawa pallinrungeng

¹ Mazmurna Daud. Ri Iko oh Puwang, upaénré sempajakku,

² oh Allataalaku, mateppe'ka lao ri Iko! Aja' taleppessakka ripakasiri, sibawa rigora-gorai risining balikku.

³ Tau iya bali'bellaé ri Iko ripakasirii matu, iyakiya iya mateppe'é ri Iko dé' naripakacélé.

⁴ Ajjellokenni élo-Mu lao ri iyya, oh Puwang, pannessani aga harusu upogau'.

⁵ Pagguruka sibawa pimpikka untu' tuwo situru élo-Mu, saba' Iko ritu Allataala iya passalama'ékku, tuli mamménasaka lao ri Iko.

⁶ Engngerangngi sininna akessingemmu sibawa pammasé-Mu, oh Puwang, iya Muwajjellokengngé ri pammulanna mupa.

⁷ Addampengenni dosa sibawa asalang wettu kalloloku, éngngerakka situru sibawa pammasé-Mu nenniya akessingem-Mu.

⁸ Saba' makessingngi Puwangnge sibawa adélé'i, Najjellokengngi lalengngé lao ri tau iya pusaé.

⁹ Puwangnge pimpingngi tau iya mariyawa atié, sibawa paggurui mennang élo-Na.

¹⁰ Tau iya mapatoé ri assijancin-Na sibawa hukkun-Na, Nagaukengngi sibawa mamasé nenniya matinulu.

¹¹ Puwang, addampengekka situru jancim-Mu, saba' battowai asalakku.

¹² Puwangnge mappagguruwangngi lao ri tau mateppe'é laleng iya harusu'é naola mennang.

¹³ Tette'i matu mennang tuwo madécéng, ana' eppona mennang manai matu tana manana.

¹⁴ Puwangnge iyanaritu sellaona tau mateppe'é, napannessai akkatta-Na lao ri mennang.

¹⁵ Tette'i matakku mattuju lao ri Puwangnge, saba' Napassalama'ka polé ri bahayaé.

¹⁶ Itaka, sibawa amaséika, saba' napassalama'ka polé ri bahayaé.

¹⁷ Pédé tattambai asussanna atikku paleppe'ka polé ri aperisekku.

¹⁸ Pénessaini anrasa-rasakku sibawa asukkarakekku, sibawa addampengenni sininna dosaku.

¹⁹ Itani pékkugi égana balikku; nacéccé senna'ka mennang.

²⁰ Jagaika sibawa passalama'ka, kuwammengngi dé' umasiri, saba' mallinrukka ri alé-Mu.

²¹ Tennapodo akessingengngé sibawa alempurengngé silaongekka, saba' mamménasaka ri Iko.

²² Oh Allataala, paleppe'ni umma'-Mu polé risininna aperisenna.