MAZMUR 24 - KITTA KAREBA MADECENG

Arung Malebbié

¹ Mazmurna Daud. Appunnangenna Puwangnge linoé lollong lise'na, linoé sibawa sininna iya monroiyéngngi.

² Napalénne'i pabborina ri tompo'na tasi'é, sibawa patettongngi ri tompo'na uwai maliyungngé.

³ Nigana wedding ménré ri Bulu-buluna Puwangnge, sibawa muttama ri laleng Bola-Na?

⁴ Tau iya dé'é namakkécella pikkiranna sibawa pangkaukenna, iya dé'é nattanro bellé-bellé sibawa dé' nassompa barahala.

⁵ Aléna ritu ribarakkaki matu sibawa ripassalama ri Puwangnge, sibawa ripannessa dé' napasala ri Allataala.

⁶ Makkuwaniro tau iya polé mangolo ri Allataala, iya polé sompai Allataalana Yakub.

⁷ Timpa'i malowang gerbang cowaé, kuwammengngi nauttama Arung iya malebbié.

⁸ Niga Arung iya malebbié? Aléna ritu Puwang iya baranié; Puwang pennoé akuwasang, iya tassebbo'é ri laleng ammusurengngé.

⁹ Timpa'i malowang gerbang cowaé, kuwammengngi nauttama Arung malebbié.

¹⁰ Niga Arung iya malebbié? Puwang Iya Pommakuwasaé, Aléna ritu Arung iya malebbié!