MAZMUR 22 - KITTA KAREBA MADECENG

Sempajang ri wettu asussangngé sibawa élong pappojiyang

¹ Untu' pamimping kor. Situru lagunna: Jonga ri éléé. Mazmurna Daud.

² Allataalaku, oh Allataalaku, magi Musalaika? Mangobbika, iyakiya tette'-Ko mabéla sibawa dé' natulukka.

³ Oh Allataalaku, mangobbika ri lakessoé, iyakiya tette'-Ko mammekko. Massempajakka ri wennié, dé'to natennang atikku.

⁴ Iyakiya Iko Arung Iya Pommapaccingngé, iya napoji-pojiyé Israélié.

⁵ Mamménasai néné-nénéta ri Iko, mamménasai mennang, sibawa Mupassalama'i mennang.

⁶ Mangobbii mennang ri Iko sibawa ripaleppe; mamménasai mennang sibawa dé' naripakacélé.

⁷ Iyakiya iyya'é lati, tenniya tolino, ricella-cella sibawa ripakatuna ri tau maégaé.

⁸ Sininna iya mitaékka méllékéllé'ka, mabbuwé sibawa paccilic-cilingngi ulunna.

⁹ Adanna mennang, “Leppessangngi mattuwangngi Puwangnge, kuwammengngi Puwangnge passalama'i, rékko masennangngi Puwangnge lao ri aléna!”

¹⁰ Iko ritu passuka polé ri parémmanangngé, sibawa mébbuka amang ri wakkanna indo'ku.

¹¹ Sipongekku jaji, engkai totoku ri laleng limam-Mu, sipongenna ri laleng parémmanang, Iko ritu Allataalaku.

¹² Aja' Mumabéla, saba' macawé'ni bahayaé, na dé'gaga mattulung.

¹³ Pada-pada banténg makkonrongngé, nakatulukka balié, pada-pada banténg liya polé ri Basan nakeppukka mennang.

¹⁴ Naoloika sibawa bawa mangnganga, pada-pada singa iya mangngaungngé sibawa palupperi.

¹⁵ Cappui awatangekku pada-pada uwai tuppa'é, leppe' manengngi buku-bukukku polé ri padduppanna, maccolo'i atikku pada-pada lilingngé.

¹⁶ Marakko tigero'ku pada-pada reppa pincengngé, maddeppé lilaku ri ellak-kellakku. Puwang, Musalaika ri tompo'na awué pada-pada tau iya matéénna.

¹⁷ Nakeppukka garembolanna tau majaé; pada-pada asu makkonrongngé katulukka mennang, toddo'i limakku sibawa ajéku.

¹⁸ Sininna bukukku uwullé bilangngi, naitaka balié selaku akkaita-itang.

¹⁹ Nabagé-bagéi mennang pakéyakku, sibawa mundiwi jumbaku.

²⁰ Iyakiya Iko, aja' tamabéla, oh Puwang, poléni masitta tulukka, saba Iko ritu awatangekku.

²¹ Paleppe'i nyawaku polé ri peddangngé, passalama'ka polé ri pakkokkona asué.

²² Dé' pakkullékku, paleppe'ka polé ri tanru'na banténgngé sibawa polé ri pannyoro'na singaé.

²³ Ucuritai matu pangkaukem-Mu lao ri silessu-silessurekku; ri laleng assiruntukenna umma'-Mu upoji-poji-Ko.

²⁴ Pojiwi Aléna, éh sining tau mateppe'é! Pakarajai Aléna, sininna wija-wijanna Yakub! Suju'no ri Aléna, sininna wija-wijanna Israélié!

²⁵ Saba' dé' Naita matunai tau ritenre'é, sibawa dé' naangga énténgngi anrasa-rasanna. Dé' Nagiling polé ri tauwéro, iyakiya maréngkalingai rékko méllau tulungngi ri Aléna.

²⁶ Ri tengngana addeppungenna umma'é upoji-Ko, nasaba sininna iya puraé Mupogau'. Ri yolona umma iya mateppe'é uwakkasuwiyangengngi akkarobangeng iya uwajjanciyangngé.

²⁷ Manréi matu tau kasiyasié gangka messo; tau iya laowé ri Puwangnge pojiwi matu. Tennapodo saléwangekko mannennungeng!

²⁸ Sininna bangsaé naéngngerangngi matu Puwangnge sibawa lisui ri Aléna, sininna suku bangsaé suju'i matu sompai Aléna.

²⁹ Saba' Puwangnge ritu makuwasa, Naparéntai bangsa-bangsaé.

³⁰ Sininna tau battowaé suju'i matu ri yolo-Na, sininna tolinoé suju'i matu sompai Aléna.

³¹ Abbatireng-abbatireng rappina massompai matu ri Puwangnge, riyabbirittangngi matu massossoreng.

³² Lao ri bangsa iya jajiyé ri munrinna ribirittaiyangngi matu makkedaé purani napassalama Puwangnge umma'-Na.