MAZMUR 20 - KITTA KAREBA MADECENG

Sempajang méllau apakalang

¹ Untu' pamimping kor. Mazmurna Daud.

² Tennapodo nabaliko Puwangnge ri wettu aperisengngé, tennapodo akuwasanna Allataalana Yakub linrungiko!

³ Tennapodo kiringngi bantuwang polé ri Bola-Na, sibawa mabbéréi pattulung polé ri Bulu Sion.

⁴ Tennapodo Aléna méngngerangngi sininna pakkasuwiyammu, nenniya masennang sibawa sininna akkarobangeng ritunummu.

⁵ Tennapodo Aléna mabbéréyangngi sininna iya muwacinnaiyé, sibawa mébbui sininna rancanamu papolé wassélé.

⁶ Natagora-gora marennu nasaba apakalammu, sibawa makkai bandéraé untu' pojiwi Allataalata. Tennapodo natarimai Puwangnge sininna paréllaummu.

⁷ Uwissenni makkekkuwangngé makkedaé Puwangnge mabbéré apakalang lao ri arung napilé-Na. Puwangnge baliwi polé ri suruga-Na iya mapaccingngé; nasaba akuwasanna Puwangnge lolongengngi apakalang battowa.

⁸ Engka tau mattuwangngi karéta musuna, engkato mattuwangngi anyaranna. Iyakiya idi mattuwangngi akuwasanna Puwangnge, Allataalata.

⁹ Tabbuttui matu mennang sibawa mabuwang, iyakiya tokkokki matu sibawa tettong masse.

¹⁰ Oh Puwang, wéréngngi apakalang arungngé, baliki wettutta mangobbi.