MAZMUR 19 - KITTA KAREBA MADECENG

Arajanna Puwangnge ri laleng winruna sibawa ri laleng hukkun-Na

¹ Untu' pamimping kor. Mazmurna Daud.

Arajanna Puwangnge ri laleng winru-Na

² Langié pannessai arajanna Allataala, sibawa bitaraé mabbirittangngi winru-Na.

³ Esso séddié palettu'i lao ri esso rappina; wenni séddié curitai lao ri wenni ri munrinna.

⁴ Dé'gaga mabbicara iyaré'ga makkeda-ada, dé'gaga sadda riyéngkalinga.

⁵ Iyakiya pangobbina massammengngi ri sininna linoé, iyaro pasengngé lettu'i ri cappa-cappa linoé. Mébbui Puwangnge bola ri langié untu' mata essoé,

⁶ maéléi masiya' pada-pada botting mpurané massu polé ri bili'na, pada-pada pabbarani iya marennué pammulaiwi allalengenna.

⁷ Natuttungngi langié polé ri cappa'na lao ri cappa'na; dé'gaga leppe polé ri pellana.

Hukkunna Puwangnge

⁸ Iyaro Hukkunna Puwangnge sukkui, napétakkari nyawaé. Wedding riyatepperi paréntana Puwangnge, nawéréngngi pangissengeng tau biyasaé.

⁹ Coco'i peraturanna Puwangnge, napésennangiwi atié. Tuléngngi iyaro attettekenna Puwangnge, naébbui tauwé pahangngi.

¹⁰ Massompa lao ri Puwangnge makessing iyaro, matteru mannennungeng. Iyaro Hukkunna Puwangnge tongengngi sibawa adélé maneng.

¹¹ Lebbi mangke'i Hukkunna Puwangnge naiya ulaweng tuléngngé, lebbi macenningngi naiya cani aslié.

¹² Riparéngngerangiwi atam-Mu ri sininnaro; tassadiyai saro battowaé lao ri tau iya turusiyéngngi.

¹³ Dé'gaga mulléi maingekiwi apusanna; Puwang, paleppe'ka polé ri asalang tassubbué.

¹⁴ Pabélaika polé ri dosa iya riyattungkaiyé, aja' taleppessakka rikuwasai ri aléna. Naumancaji dé' cellana, sibawa leppe polé ri pelanggarang matane'é.

¹⁵ Tennapodo ada-ada sibawa pikkirakku Muéloriwi, oh Puwang, pallinrung sibawa pappassalama'ku!