MAZMUR 18 - KITTA KAREBA MADECENG

Elong apakalangenna Daud

¹ Untu' pamimping kor. Mazmurna Daud, atanna Puwangnge. Napuwélongengngi Puwangnge wettunna Daud rileppessang polé ri Saul sibawa polé risining balinna.

² Upojiki, oh Puwang, Iko ritu awatangekku.

³ Padai Puwangnge bénténg mawatangngé onrokku mallinrung. Padai Allataalaku bulu batué onrokku maccinaung. Padai kaliyawoé tongkoka, sibawa jagaika kuwammengngi utuli amang.

⁴ Mangobbika lao ri Puwang iya sipato'é ripoji, iya paleppe'ékka polé risining balikku.

⁵ Riyattulilingika ri bahaya amaténgngé sibawa nalle lémpe abinasangngé.

⁶ Nattulilingika bahaya amaténgngé, jebba amaténgngé engkai ri yoloku.

⁷ Ri laleng aperisekku mangobbika lao ri Puwangnge, Goraka lao ri Allataalaku méllau pattulung. Polé ri Bola-Na Naéngkalingai saddakku sibawa jampangiwi pangobbiku.

⁸ Nainappa taggoccang linoé sibawa ténré, goyang sining pabborina bulué sibawa ténré nasaba caina Allataala.

⁹ Mapporo' rumpué polé ri sebbo inge'-Na, api sibawa bara massu polé ri bawa-Na.

¹⁰ Napuwé'i langié, nainappa nonno sibawa ellung mapettang ri yawana ajé-Na.

¹¹ Luttui sibawa tonangi kérub; sajéi ri yasé'-Na pannina angingngé.

¹² Natongkoi Aléna sibawa pettang; ellung malilling iya makkompe'é mattulilingiwi Aléna.

¹³ Polé ri billa'é ri yolo-Na, massui ellungngé, bosi ése'é sibawa apié.

¹⁴ Nainappa magguttu Puwangnge polé ri bitaraé; napparéngkalingangngi saddan-Na Iya Pommatanré.

¹⁵ Nattémbakengngi sining pana-Na sibawa patassiya-siyai balié; Nassarampakengngi billa'é makkolik-koling, naébbui mennang lari.

¹⁶ Tattimpa borina tasi'é sibawa tabbukka pallanggana linoé wettunna Puwangnge nagera' balin-Na sibawa macai.

¹⁷ Polé ri yasé naloro'i liman-Na Puwangnge; Nakkatennikka sibawa Nagettekka polé ri uwai iya maliyungngé.

¹⁸ Napassalama'ka polé ri bali iya poré sibawa polé risining tau iya céccéékka, nasaba mawatang senna'i mennang untu' aléku.

¹⁹ Nagasaka mennang wettukku nakenna abala, iyakiya Puwangnge mancaji pattulukku.

²⁰ Naleppessakka polé ri bahayaé nanapassalama'ka nasaba Naélorika.

²¹ Nawale'i Puwangnge pangkaukekku iya tongengngé; Nabarakkakika nasaba dé' upasala.

²² Uturusiwi paréntana Puwangnge sibawa dé' ugiling polé ri Allataalaku.

²³ Sininna hukkun-Na upuriyatiwi, parénta-parénta-Na dé' uwallupaiwi.

²⁴ Naisseng makkedaé dé' cellaku sibawa pabélaiwi alé polé ri asalangngé.

²⁵ Nanawale'i Puwangnge pangkaukekku iya tongengngé saba' naissengngi dé' upasala.

²⁶ Puwang, matinulu-Ko lao ri tau iya matinulué sibawa makessingngi lao ri tau iya makessingngé.

²⁷ Lao ri tau iya mapaccingngé Mupannessai Alému mapaccing, iyakiya tau iya majaé Mumusui.

²⁸ Mupassalama'i tau iya mariyawa atié, iyakiya tau iya matempoé Napatunru'i.

²⁹ Mupalluwa'i pajjennangekku; natajangiwi Puwang Allataalaku pettakku.

³⁰ Mupéwatangika untu' paccappui balié; nasibawang bantuwanna Allataalaku uleppoi attahanangenna mennang.

³¹ Sukku pangkaukenna Allataala weddingngi riyatepperi jancinna Puwangnge. Pada-padai kaliyawoé lao ri sininna iya mallinrungngé ri Aléna.

³² Saba' banna Puwangnge ritu Allataala; Allataala bawang pangéwaingetta.

³³ Aléna ritu Allataala iya péwatangiyékka sibawa mébbui lalekku amang.

³⁴ Napéwatangiwi ajéku pada-pada ajé jongaé, sibawa jagaiwi asalamakekku ri bulué.

³⁵ Nalatika untu' mammusu, angkanna uwulléi paggettengngi pana iya kaminang mawatangngé.

³⁶ Puwang, Mulinrungika sibawa passalama'ka, nenniya tula'ka sibawa akuwasam-Mu; mancajika tassebbo nasaba tindakam-Mu.

³⁷ Muwonrowakka kuwammengngi dé' naritawakka, sibawa dé' naengka umabuwang.

³⁸ Ulellungngi balikku sibawa ucaui mennang, nenniya pémmali soro narapi mennang cappu.

³⁹ Uwabbantingeng mennang angkanna dé'na naulléi moto'na, rebbai mennang dé' pakkullénna ri yolona ajéku.

⁴⁰ Muwérékka awatangeng untu' mammusu, sibawa apakalang lao risining balikku.

⁴¹ Muwébbui balikku lari polé ri iyya; sining tau iya céccéékka upaccappui.

⁴² Gorai mennang, iyakiya dé'gaga mattulung, mangobbii mennang lao ri Puwangnge, iyakiya dé' Nappébali.

⁴³ Ureppo'i mennang pada-pada awu iya tassiyampoé, sibawa useringngi pada-pada bungkaé ri lalengngé.

⁴⁴ Mupaleppe'ka polé ri appang iya madorakaé, Namupancajika panguwasana bangsa-bangsaé; bangsa iya dé'é uwissengngi mancajiwi atakku.

⁴⁵ Sining tau laingngé tunru'i lao ri iyya sibawa mapato rékko naéngkalingai paréntaku.

⁴⁶ Teddénni abaraningenna mennang; ténréi mennang sibawa massu polé ri bénténna.

⁴⁷ Tuwoi Puwangnge! Ripojiwi pangéwaingekku! Pakarajai aloppongenna Allataala pappassalama'ku!

⁴⁸ Nawérékka apakalang lao ri balikku; Napatunru'i bangsa-bangsaé ri yoloku,

⁴⁹ Napassalama'ka polé risining balikku. Puwang, Muwérékka apakalang lao ri balikku, Mulinrungika polé risining tau mabecco'é.

⁵⁰ Naupakaraja-Ko ri yelle'na bangsa-bangsaé, sibawa upuwélongek-Ko pappoji-pojiyang.

⁵¹ Allataala mpéréngngi apakalang battowa lao ri arun-Na, tette'i namaséi tau napilé-Na, iyanaritu Daud sibawa wija-wijanna untu' mannennungeng.