MAZMUR 17 - KITTA KAREBA MADECENG

Sempajanna tau iya dé'é napasala

¹ Sempajanna Daud. Engkalingai pangobbiku méllau adélékeng, pénessaiwi sempajakku iya tongengngé, oh Puwang.

² Tabélani parakaraku saba' Muwisseng aga tongengngé.

³ Rékko Muojiwi atikku sibawa polé salidikika ri wennié, Mupoléiwi matu makkedaé mattonget-tongekka; ada-adakku siturui sibawa pikkirakku.

⁴ Upogau'i aga iya Muwapparéntangngé sibawa dé' muwolai laleng ateddekengngé.

⁵ Tuli tuwoka situru panunju'-Mu sibawa dé' naléssé polé ri alé-Na.

⁶ Mangobbika ri Iko, oh Allataala, saba' Mubalika; jampangika sibawa éngkalingai ada-adakku.

⁷ Ajjellokenni pammasé-Mu iya mappabengngaé saba' Mupassalama'i tau iya mallinrungngé ri alé-Mu, ri seddému amangngi mennang polé ri paggasana balié.

⁸ Piyaraka pada-pada lise matammu, subbuka ri laleng accinaungenna pannimu

⁹ polé ri paggasana tau majaé. Rikeppukka ri bali iya maéloé mpunoka;

¹⁰ dé' naisseng mennang mamasé nenniya mabbicara sibawa matempo.

¹¹ Mallurui mennang méwaka sibawa katulukka, sappai kasempatang untu' mabbantingekka.

¹² Pada-padai mennang singa maéloé lupperiwi anréna, singa lolo iya mangadangngé ri onrong massubbué.

¹³ Tokkonni, oh Puwang, éwani balikku sibawa cauni mennang. Passalama'ka sibawa peddam-Mu polé ri paggasana tau majaé.

¹⁴ Leppessakka polé risining tau iya goppoé waramparang ri linoé. Hukkungngi mennang sibawa abala iya puraé Mupassadiyangengngi mennang. Leppessangngi ana' eppona rihukkung towi.

¹⁵ Iyakiya iyya uwita-Ko matu, saba' dé' upasala. Ri wettukku moto, ahadérékem-Mu mébbui atikku marennu.