MAZMUR 16 - KITTA KAREBA MADECENG

Sempajang pennoé ateppereng

¹ Jagaika, oh Allataala, saba' ri Iko ritu mallinrukka.

² Makkedaka, “Iko ritu Puwak-ku, ariyo-riyokku, dé'gaga iya lebbiyé naiya Iko!”

³ Upakalebbii sining tau mapaccingngé ri wanuwaéwé; asennangekku iyanaritu monro silaong mennang.

⁴ Leppessangngi tau iya massompaé déwata-déwata tattamba-tamba amessénna. Dé' umaélo makkarobangeng lao ri déwata-déwataé, mala dé' umaélo teppui asenna mennang.

⁵ Puwang, Iko bawang uwappunnangi; Muwabbéréyangngi sininna iya uwapparelluwangngé, totoku engkai ri limam-Mu.

⁶ Makessing tongeng pabbéré-Mu untu' aléku, napésennangi senna'i atikku!

⁷ Upojiwi Puwang iya pangajariyékka; muwi ri wennié napangajarika sadda atikku.

⁸ Tuli uwéngngerangngi Puwangnge; engkai ri benrékku, na dé'na ugoyang.

⁹ Rimakkuwannanaro marennui atikku sibawa gora-gorai nyawaku, nenniya mappésauwi tubukku sibawa tennang.

¹⁰ Saba' dé' Muleppessakka maté; tau iya Muwamaséiyé dé' Muleppessangngi maté.

¹¹ Mujellokekka laleng mattujué ri atuwongngé; ri alé-Muka lolongeng arennung maonaé sibawa ariyo-riyong untu' mannennungengngé.