MAZMUR 148 - KITTA KAREBA MADECENG

Langié sibawa linoé, pojiwi Puwangnge !

¹ Pojiwi Puwangnge! Pojiwi Puwangnge, éh silise surugaé! Sininna iya monroé ri onrong matanré, pojiwi Aléna!

² Pojiwi Aléna, éh sininna malaéka'na. pojiwi Aléna, éh sininna tentarana surugaé!

³ Pojiwi Aléna, éh mata essoé sibawa kétengngé, pojiwi Aléna, éh sining wéttowing iya mappidé-pidé!

⁴ Pojiwi Aléna, éh langi iya kaminang matanré, pojiwi Aléna, éh uwai ri yasé'na langié!

⁵ Makessingeng manengngi mennang pojiwi asenna Puwangnge, saba' ripancaji manengngi nasaba parénta-Na.

⁶ Napattentui onronna tungke-tungke, attetteken-Na takkennai untu' mannennungeng.

⁷ Pojiwi Puwangnge, éh silise linoé, éh naga-naga tasi sibawa sininna dolangeng malowangngé;

⁸ éh billa sibawa bosi ése, salju sibawa ellung, anginraja iya turusiyéngngi paréntana Puwangnge!

⁹ Pojiwi Aléna, éh bulu-bulu sibawa sining bulu, pong buwa-buwaé sibawa sininna ale'é;

¹⁰ sininna olokolo ripiyaraé sibawa olokolo maliyaé, sininna olokolo makkalolo'é sibawa manu'-manu'é!

¹¹ Pojiwi Aléna, éh arung-ngarungngé sibawa sininna bangsaé, sining arungngé sibawa sininna panguwasaé;

¹² sininna kalloloé sibawa ana'daraé, tomatowaé sibawa tau maloloé.

¹³ Makessingeng manengngi mennang pojiwi asenna Puwangnge, saba' lebbi marajai asen-Na naiya sininna asengngé; arajan-Na naliwengngi langié sibawa linoé.

¹⁴ Purani napéwatangi bangsa-Na, angkanna ripoji-poji ri umma'-Na, Israélié, umma Napojiyé. Pojiwi Puwangnge!