MAZMUR 147 - KITTA KAREBA MADECENG

Pappojiyang untu' Allataala Iya Pommakuwasaé

¹ Pojiwi Puwangnge! Saba' makessingngi pojiwi Aléna, sibawa mappésennang untu' Aléna makkélongengngi pappojiyang!

² Napalisui matu Puwangnge Yérusalém; Napalisui matu sining tau ripalié.

³ Napajjappai tau iya pettu paddennuwangngé, sibawa bebbe'i sining lona mennang.

⁴ Napattentui jumellana wéttowingngé ri bitaraé, sibawa tungke-tungke Nawéréngngi aseng.

⁵ Battowa tongeng sibawa masero Puwat-ta, dé' naribilang apanrén-Na.

⁶ Napatokkongngi tau iya ritenre'é, iyakiya tau majaé Naggeppuwangngi ri tanaé.

⁷ Puwélongenni pappoji-pojiyang Puwangnge, acculéngenni kacapi Allataalata.

⁸ Aléna pallebba ellung ri langié; Napassadiyangengngi bosi linoé, sibawa naébbui tuwo wellaé ri bulu-bulué.

⁹ Nawéréngngi inanré olokolo'é, sibawa ana' kao-kaoé iya mangobbi-obbié.

¹⁰ Iya napojiyé Puwangnge tenniya anyarang iya mawatangngé; tenniyato pajuwang iya baranié.

¹¹ Masennangngi Puwangnge lao ri tau iya mateppe'é, lao ri tau iya tette'é maddennuwangiwi pammasé-Na.

¹² Pojiwi Puwangnge, éh Yérusalém! Pojiwi Allataalamu, éh Sion!

¹³ Saba' Napakkasse'i pintu-pintu gerbammu, sibawa barakkakiwi pabbanuwamu.

¹⁴ Najagaiwi daéramu kuwammengngi natette amang, sibawa pamessoriko sibawa gandong iya kaminang makessingngé.

¹⁵ Nawéréngngi parénta linoé, sibawa masitta'i ripogau' ada-adan-Na.

¹⁶ Napateppai saljué pada-pada ape'é, sibawa massiyamporeng cinoddo mattékké pada-pada awué.

¹⁷ Napateppai bosi ése'é pada-pada batu-batué; dé'gaga tahang moloiwi keccé'na.

¹⁸ Nainappa nasaba parénta-Na maccolo'i iyaro ése'é; Nasseppungengngi angingngé, namassolo tona uwai.

¹⁹ Napalettu'i pasen-Na lao ri umma'-Na, attettekenna sibawa hukkun-Na lao ri umma napilé-Na.

²⁰ Dé' napogau'i makkuwaéro lao ri bangsa-bangsa laingngé, dé' naissengngi mennang hukkung-hukkun-Na. Pojiwi Puwangnge!