MAZMUR 139 - KITTA KAREBA MADECENG

Allataala Pommissengngi sibawa piyarai sini-sininnaé

¹ Untu' pamimping kor. Mazmurna Daud. Oh Puwang, Muwellungika sibawa missekka.

² Muwisseng sininna pangkaukekku; Mupahangngi pikkirakku polé mabéla.

³ Muwitaka, muwi mappallaukka iyaré'ga mappésau, Muwissengngi sininna iya upogau'é.

⁴ Mala ri wettu dé'napa umabbicara, Muwisseng aga iya maéloé upowada.

⁵ Muwattulilingika polé ri sininna sulapa'é, nenniya Mulinrungika sibawa akuwasam-Mu.

⁶ Iyaro pangissengem-Mu malamung senna untu' aléku, dé' narapii pikkirakku.

⁷ Kégaka wedding lao kuwammengngi leppe'i polé ri akuwasam-Mu? Kégaka wedding lari mabéla polé ri yolo-Mu?

⁸ Rékko ménré'ka ri langié, engka-Ko kuwaro, rékko matinroka ri linona amaténgngé, engka tokko kuwaro.

⁹ Rékko luttuka lalo ri pong bétaraé ri alau iyaré'ga monro ri cappa yajang iya kaminang mabélaé,

¹⁰ kuwatoro Mutulukka; kuwatoro Napimpikka limam-Mu.

¹¹ Rékko uwéllauwi kuwammengngi nasalipurika pettangngé, sibawa tajangngé ri mattulilikku mancaji wenniwi,

¹² na iyaro pettangngé dé'to namapettang untu' alé-Mu; iyaro wennié matajangngi pada-pada essoé, sibawa iyaro pettangngé pada-padai tajangngé.

¹³ Mupancajiwi tungke bagiyanna watakkaléku, sibawa tappaka ri laleng parémmananna indo'ku.

¹⁴ Upoji-Ko saba' dé'gaga padakku! Sininna pangkaukem-Mu makalallaingngi sibawa mappabengnga, tonget-tongengngi umaingeki.

¹⁵ Wettunna buku-bukukku ripancaji, sibawa ripasisambus-sambung sibawa matutu ri laleng parémmananna indo'ku, nautuwo kuwaro secara rahasiya, dé' utassubbu ri alé-Mu.

¹⁶ Muwitaka wettukku ri laleng parémmanang; taroki manengngi ri laleng kitta'-Mu; pura ripattentuni esso-essona ri wettu dé'napa muwi séddi ripammulai.

¹⁷ Temmaka watanna pikkiram-Mu untu' aléku, oh Allataala, sibawa temmaka égana jumellana!

¹⁸ Rékko ubilangngi, lebbi maégai naiya kessi'é; rékko moto'ka, Iko mupa upikkiri.

¹⁹ Tennapodo Mupaccappui tau majaé, oh Allataala, pabélaiwi sining pappassu daraé polé ri iyya!

²⁰ Napowadai mennang majaé passalenna Iko, sibawa mattanro bellé-belléi nasabbing kota-kota-Mu.

²¹ Oh Puwang, ucéccé tau iya céccéék-Ko, massesse atikku lao ri tau iya méwaék-Ko!

²² Ucéccé senna mennang, sibawa uwangga selaku bali.

²³ Salidikika oh Allataala, wellungiwi atikku, ojika sibawa issengngi pikkirakku.

²⁴ Itai ajakké engka ja ri laleng aléku, sibawa pimpikka ri laleng iya mannennungengngé.