MAZMUR 138 - KITTA KAREBA MADECENG

Sempajang sukkuru

¹ Polé ri Daud. Oh Puwang, maéloka sukkuru lao ri Iko, sibawa sukku atikku. Ri yolona sininna déwataé upuwélongngi pappojiyangngé untu' alé-Mu.

² Suju'ka mattuju ri Bola-Mu iya mapaccingngé naupoji towi asem-Mu, saba' matinulu-Ko sibawa tuli mamasé. Lebbi Mupentingkangngi jancim-Mu naiya pallolongenna tauwé passalenna alé-Mu.

³ Wettukku mangobbi lao ri Iko, mappébali-Ko, Mupéwatangiwi atikku angkakku mancaji barani.

⁴ Sininna arungngé ri linoé napoji-Ko matu, oh Puwang, saba' purani mennang naéngkalinga jancim-Mu.

⁵ Makkélongngi matu mennang passalenna pangkaukem-Mu sibawa passalenna arajam-Mu iya battowaé.

⁶ Malempu senna'-Ko, iyakiya Mujampangi towi iya matunaé, dé' naulléi massubbu tau matempoé polé ri Iko.

⁷ Wettukku nakenna asussang, Muwattahangengngi atuwokku. Muéwai balikku iya mattengngangngé majjallo sibawa passalama'ka sibawa akuwasam-Mu.

⁸ Mupennoiwi matu jancim-Mu lao ri iyya; aja' muwappésau tinda untu' umma'-Mu.