MAZMUR 118 - KITTA KAREBA MADECENG

Sempajang sukkuru nasaba apakalangngé

¹ Sukkuru'no lao ri Puwangnge saba' makessingngi, mannennungengngi pammasé-Na.

² Sitinajai makkeda tau Israélié, “Mannennungengngi pammasé-Na.”

³ Sitinajai makkeda sining imangngé, “Mannennungengngi pammasé-Na.”

⁴ Sitinajai makkeda sining tau mateppe'é, “Mannennungengngi pammasé-Na.”

⁵ Ri laleng aperisekku mangobbika lao ri Puwangnge; namappébali sibawa paleppe'ka.

⁶ Dé' umétau saba' nasibawakka Puwangnge, dé' pakkullénna tolinoé lao ri iyya.

⁷ Nasibawakka Puwangnge untu' tulukka, uwitai matu balikku ricau.

⁸ Lebbi kessing muwi mallinrung ri Puwangnge, naiya mattuwangngi tolinoé.

⁹ Lebbi kessing muwi mallinrung ri Puwangnge, naiya maddennuwangiyéngngi bangsa-bangsaé.

¹⁰ Maéga bali mattulilingika; nasibawang akuwasanna Puwangnge, ucaui mennang.

¹¹ Nakeppukka polé ri sininna sulapa'é; nasibawang akuwasanna Puwangnge, ucaui mennang.

¹² Nakatulukka mennang pada-pada wanié; nasibawang akuwasanna Puwangnge, ucaui mennang. Ri laleng sikédé ripeddéiwi mennang pada-pada api iya tunuéngngi ale-kale maddorié.

¹³ Rigasaka sibawa masero nacéddé'ka sempé, iyakiya Puwangnge tulukka.

¹⁴ Puwangnge iyanaritu awatangekku sibawa usompaé, puraka napassalama.

¹⁵ Engkalingai gora-gora apakalangngé ri akkéma-kémanna umma'-Na, “Napogau'i Puwangnge pangkaukeng poré!

¹⁶ Akuwasanna Puwangnge mpérékki apakalang! Napogau'i Puwangnge pangkaukeng poré.”

¹⁷ Dé' umaté matu, iyakiya tette tuwo untu' mabbirittangngi ébbuna Puwangnge.

¹⁸ Puraka nasissa Puwangnge sibawa maladde, iyakiya dé' nabbéréyakka lao ri amaténgngé.

¹⁹ Timpakekka pintu gerbang Bolana Puwangnge, kuwammengngi umuttama sibawa sukkuru lao ri Aléna.

²⁰ Iyanaé pintu gerbang Puwangnge, banna tau malempué wedding molai.

²¹ Upoji-Ko, saba' Mutarimai sempajakku; puraka Muwéréng apakalang.

²² Batu iya nabuwangngé panré bolaé, mancajini batu passunna.

²³ Iyanaro pangkaukenna Puwangnge, napabengnga tongekki.

²⁴ Iyanaé esso iya napattentué Puwangnge; laono mai taramé-raméiwi sibawa marennu.

²⁵ Méllauki, Puwang, passalama'ki, oh Puwang, wérékki apakalang!

²⁶ Ribarakkakiwi iya polé ri laleng asenna Puwangnge. Ribarakkakiko polé ri Bolana Puwangnge.

²⁷ Puwangnge iyanaritu Allataala, makacuwai lao ri idi. Alluruno mabbarisi sibawa takké-takké ri limaé, sibawa attulilingiwi mézbana Puwangnge.

²⁸ Iko Allataalaku, sukkuru'ka lao ri Iko, Allataalaku, upakaraja-Ko.

²⁹ Sukkuru'no lao ri Puwangnge saba' makessingngi, mannennungengngi pammasé-Na.