MAZMUR 115 - KITTA KAREBA MADECENG

Pappojiyang untu' Allataala Iya Pommakuwasaé

¹ Tenniya idi, oh Puwang, tenniya idi, iyakiya Iko bawang harusu ripoji, saba' matinulu-Ko sibawa tette mamasé.

² Magi bangsa-bangsaé naharusu makkeda, “Kégani Allataalana mennang?”

³ Allataalata engkai ri surugaé, napogau'i aga iya Naéloriyé.

⁴ Barahalana mennang poléi ri ulawengngé sibawa péra'é, ébbu lima tolino.

⁵ Mappunnaiwi mennang tému, iyakiya dé' naulléi mabbicara, mappunnaiwi mata, iyakiya dé' naulléi makkita.

⁶ Mappunnaiwi mennang daucculing, iyakiya dé' naulléi mennang maréngkalinga, mappunnaiwi inge, iyakiya dé' naulléi marémmau.

⁷ Mappunnaiwi mennang lima, iyakiya dé' naulléi makkarawa, mappunnaiwi ajé, iyakiya dé' naulléi joppa, sibawa dé'gaga sadda massu polé ri tigero'na.

⁸ Tennapodo makkuwairo totona sining tau iya mébbuéngngi, sibawa sininna tau iya mateppe'é lao ri aléna.

⁹ Eh Israélié, amménasano lao ri Puwangnge, Aléna ritu mattulung sibawa linrungiko.

¹⁰ Eh sining imangngé, amménasano lao ri Puwangnge, Aléna ritu mattulung sibawa linrungiko.

¹¹ Eh sininna tau mateppe'é, amménasano lao ri Puwangnge, Aléna ritu mattulung sibawa linrungiko.

¹² Naéngngerakki Puwangnge sibawa nabarakkakiki matu, Nabarakkakiwi matu umma Israélié sibawa sininna imang wija-wijanna Harun.

¹³ Nabarakkakiwi matu sining tau mateppe'é, muwi baiccu'é iyaré'ga battowaé.

¹⁴ Tennapodo nawérékko Puwangnge maéga ana', lao ri iko sibawa wija-wijammu.

¹⁵ Tennapodo nabarakkakiko Puwangnge, pancajiyéngngi langié sibawa linoé!

¹⁶ Langié iyanaritu appunnangenna Puwangnge bawang, iyakiya linoé Nawéréngngi tolinoé.

¹⁷ Dé' naripoji Puwangnge ri tau maté, tau iya nonnoénna ri onrong iya masino-sinoé.

¹⁸ Iyakiya idi iya tuwoé sukkuru'ki lao ri Aléna, makkekkuwangngé sibawa lettu mannennungeng. Pojiwi Puwangnge!