MAZMUR 112 - KITTA KAREBA MADECENG

Asennangenna tau makessingngé

¹ Pojiwi Puwangnge! Masennangngi tau mateppe'é, iya pojiyéngngi sining paréntana Puwangnge.

² Makuwasai matu ana'-ana'na ri wanuwaéwé, ribarakkakiwi matu wijanna tau makessingngé.

³ Sugii matu kaluwargana sibawa madécéng, sibawa saléwangengngi matu mannennungeng.

⁴ Mattappai matu tajangngé ri laleng pettangngé untu' tau malempué, untu' tau adélé'é, mamaséi sibawa pacarinnai.

⁵ Masennangngi tau iya makacuwaé sibawa napoji mappainreng enrengngé malempu risininna urusangngé.

⁶ Dé' namakkullé natemmallolongeng tau makessingngé; riyéngngerangngi matu mannennungeng.

⁷ Dé' namétau tarima karéba maja, masse'i atinna nasaba mateppe'i lao ri Puwangnge.

⁸ Dé' namanenneng iyaré'ga métau, nasaba mateppe'i ricaui matu balinna.

⁹ Natawa-tawai waramparanna, sibawa mabbéréi sidekka lao ri tau kasiyasié; tuli napogau'i iya makessingngé, rimakkuwannanaro makuwasai sibawa ripakalebbi.

¹⁰ Riitai ri tau majaé namancaji macaina; naggarettakengngi mennang isinna nasaba nacéccéi. Nainappa binasa mennang; teddénni amménasanna mennang untu' mannennungeng.