MAZMUR 109 - KITTA KAREBA MADECENG

Sempajang ri laleng asussang

¹ Untu' pamimping kor. Mazmurna Daud. Oh Allataala iya tuli upojiyé, aja' tamammekko.

² Saba' nagasaka tomajaé sibawa topabengnguwangngé iya massiyamporengngé curita-curita bellé passalekku.

³ Nagasaka mennang sibawa ada-ada penno paccéccé, sibawa musuka temmakkéalasang.

⁴ Nateppuka mennang, namuni uwamaséiwi mennang, sibawa pura massempajangengngi mennang.

⁵ Nawale'i mennang akessingekku sibawa ja, nenniya pammaséku sibawa paccéccé.

⁶ Akkano séddi tau maja untu' madélékiwi, leppessanni ritenre ri balinna.

⁷ Leppessanni riadéléki sibawa ripannessa sala, sibawa leppessanni sempajanna riangga dosa.

⁸ Leppessangngi atuwonna masitta maccappa, sibawa jabatanna nalai tau laingngé.

⁹ Leppessanni ana'-ana'na mancaji béu, sibawa bainéna mancaji janda.

¹⁰ Leppessanni ana'-ana'na mancaji paréllau-éllau iya solléé, sibawa rirukka polé ri ruttungeng bolana.

¹¹ Leppessanni sininna appunnangenna ribésella ri passinge inrengngé, sibawa wassélé turuppuse'na narampasa tauwé.

¹² Aja' naengka makessing ati lao ri aléna, iyaré'ga carinnaiwi ana'-ana' iya nasalaiyé.

¹³ Leppessangngi sininna wija-wijanna ripaccappu, sibawa asenna riyallupai ri abbatireng ri munrié.

¹⁴ Leppessangngi jana toriyolona tette naéngngerang Puwangnge, sibawa dosana indo'na dé' nariledda.

¹⁵ Leppessanni dosana mennang tuli naéngngerang Puwangnge, sibawa dé'gaga méngngerangngi mennang ri linoé.

¹⁶ Saba' iyaro tauwé dé' naengka naéngngerangngi untu' mappaitang paressé babuwa. Nacallai tau kasiyasié sibawa manrasa-rasaé, sibawa naunoi tau iya malemmaé.

¹⁷ Napojiwi patanroi; leppessanni aléna nakenna tanro! Dé' napojiwi mabbéré barakka, leppessanni dé'gaga barakka untu' aléna!

¹⁸ Untu' aléna iyaro patanroié pangkaukeng biyasa, pada-pada muwa pasangngi pakéyanna. Leppessanni iyaro tanroé mabbarébé pada-pada uwai ri watakkaléna, sibawa pada-pada minnya'é ri laleng buku-bukunna.

¹⁹ Leppessangngi iyaro tanroé tongkoi pada-pada pakéyangngé, sibawa tuli malilii pada-pada babbangngé.

²⁰ Puwang, pateppai pahukkungengngéro ri yasé'na teppuékka, ri yasé'na tau iya mabbicara majaé passalekku.

²¹ Iyakiya tulukka situru sibawa jancim-Mu, oh Puwang Allataalaku, passalama'ka nasaba akessingemmu sibawa pammasé-Mu.

²² Saba' kasiyasika sibawa manrasa-rasa, sibawa maloi atikku lettu marilaleng.

²³ Céddé'ka teddéng pada-pada wajo-wajoé ri arawéngngé, riyaggeppuwakka pada-pada incalé.

²⁴ Ténré uttuku nasaba mappuwasa, watakkaléku mancaji marakkoi namakojo.

²⁵ Sining tau iya mitaékka napakatunaka nanapaccilic-ciling towi ulunna.

²⁶ Tulukka, oh Puwang Allataalaku, passalama'ka situru sibawa pammasé-Mu.

²⁷ Nanaissengngi matu balikku makkedaé iyaro pangkaukem-Mu, makkedaé Iko Puwang, iya pogau'éngngi.

²⁸ Namuni mennang natanroika, tennapodo Iko barakkakika. Muwi tokkongngi mennang, ripakasirii matu mennang; iyakiya tennapodo iyya, atam-Mu, ripakarennui.

²⁹ Leppessangngi sining tau iya tenre'ékka ripennoi atunang, sibawa pappénedding masiri tongkoi mennang pada-pada jumbaé.

³⁰ Maéloka pojiwi Puwangnge sibawa sadda macenno, pakalabbai Aléna ri tengngana addeppungenna umma'é.

³¹ Saba' Aléna méwaiwi sibawa passalama'i tau kasiyasié polé ri mennang iya pateppaéngngi pahukkung maté ri yasé'na.