MAZMUR 104 - KITTA KAREBA MADECENG

Pappoji untu' pappancajiyé

¹ Pojiwi Puwangnge, éh nyawaku! Temmaka raja-Mu, oh Puwang Allataaku! Mappakéko agelloreng sibawa alebbireng,

² sibawa tassampo cahaya. Mupallebba'i langié pada-pada kémaé,

³ sibawa patettongngi bolamu ri tompo'na uwai ri langié. Ellungngé Mupancaji karéta-Mu, Mutonangiwi pannina angingngé.

⁴ Angingngé Mupancaji suro-Mu, sibawa billa'é pattumanim-Mu.

⁵ Masse'i linoé mupasang ri pallanggana, angkanna dé' nakédo untu' mannennungeng.

⁶ Musampoi sibawa dolangeng malowangngé, uwaina nalle'i coppo-coppo bulué.

⁷ Wettunna Mugera', massolo'i iyaro uwai, massolo'i sibawa masolo' nasaba memmu'i saddam-Mu.

⁸ Massolo'i naolai sining bulué lao ri laleng lompo'é, lao ri onrong iya Mupassadiyangengngéngngi.

⁹ Mupattentungengngi sining pakkaséséng iya dé'é nawedding naola, kuwammengngi aja' nalisu malle'i linoé.

¹⁰ Mupacumpai mata uwai risining lompo'é, massolo'i ana' saloé ri yelle'na sining bulu-bulué,

¹¹ untu' painungngi sininna olokolo'é ri dare'é, sibawa passauwi dekkana sining kaleddé ale'é.

¹² Ri seddéna mébbui sarang manu'-manu'é; moniwi mennang ri yelle'na daud-daungngé.

¹³ Mupateppai bosié ri bulué polé ri langié, pennoi linoé sibawa wassélé ébbu-Mu.

¹⁴ Mupatuwoi wellaé untu' olokolo'é, sibawa untu' tolinoé sakke rupa tanet-taneng. Naweddingngi mallaonruma,

¹⁵ sibawa powassélé uwai anggoro iya pasennangiyé. Makkuwatoro minnya zaitun iya mébbuéngngi rupanna maccahaya, sibawa inanré iya mpéréngngéngngi awatangeng.

¹⁶ Ajukajunna Puwangnge lolongengngi bosi maona aju camara Libanon iya Alénaé tanengngi.

¹⁷ Kuwaro massaranni manu'-manu'é, massarangngi coko'é ri coppo'na.

¹⁸ Sining bulu matanré mancajiwi onronna bémbé ale'é; palando'é massubbui ri batu karangngé.

¹⁹ Muwébbui kétengngé mancaji pattanrang wettu, naisseng mata essoé wettu labuna.

²⁰ Rékko Mupateppai pettangngé, mancaji wennini essoé, namallamparenna sininna olokolo ale'é.

²¹ Mangngaungngi singa-singa loloé sappa inanré, méllau inanré iya napassadiyaé Allataala.

²² Rékko mompoi mata essoé, massalai mennang sibawa léwu ri onrong assubbuwanna.

²³ Nainappa massu tolinoé untu' jamai jamanna, sibawa matteru mappallaung narapi arawéng.

²⁴ Temmaka égana winru-Mu, Puwang, iya manenna Mupancajiwi sibawa mapanré; pennoi linoé sibawa iya Mupancajiyé.

²⁵ Itai tasi'é iya malowangngé mallebbang, silaong mahlu' baiccu battowaé tenribilang.

²⁶ Kuwaniro sompe sining kappala'é, sibawa Léwiatan, naga tasi Mupancajiyé, macculé-culé.

²⁷ Iya manenna mennang mamménasai-Ko, untu' lolongeng inanré ri wettunna.

²⁸ Mabbéré-Ko, na mennang paddeppungengngi, Mupassadiyai, na mennang manréi gangka cau.

²⁹ Rékko gilik-Ko, métaui mennang; rékko Muwalai nappase'na, cappuni mennang, sibawa lisu mancaji awu pada-pada pammulanna.

³⁰ Iyakiya rékko Muwéréngngi mennang nappase, ripancajiwi mennang; Muwéréngngi atuwong mabaru linoé.

³¹ Tennapodo arajan-Na Puwangnge tette'i mannennungeng! Tennapodo marennui sibawa sininna Napancajiyé!

³² Naitai linoé sibawa naébbui ténré, Nagéssai sining bulué Namassu rumpunna.

³³ Maéloka makkélong untu' Puwangnge gangka tuwoku, makkélong pappojiyang untu' Allataalaku ri wettu engkaku mupa.

³⁴ Tennapodo Natarimai élokku, saba' Aléna mébbui atikku marennu.

³⁵ Leppessanni lennye tau madosaé ri tompo'na linoé, leppessanni tau majaé cappu binasa. Pojiwi Puwangnge, éh nyawaku! Pojiwi Puwangnge!