MAZMUR 103 - KITTA KAREBA MADECENG

Pammaséna Allataala

¹ Polé ri Daud. Pojiwi Puwangnge, éh nyawaku, sininna batékku, pojiwi asen-Na iya mapaccingngé.

² Pojiwi Puwangnge, éh nyawaku, aja' muwallupaiwi sininna akessingen-Na!

³ Aléna iya maddampengengngéngngi sininna dosamu, iya pajjappaéngngi sininna lasamu.

⁴ Aléna iya paleppe'éngngi nyawamu polé ri kuburu'é, iya bolloiyékko sibawa pammasé nenniya paressé babuwa.

⁵ Aléna iya sennangiyéngngi atuwommu sibawa iya makessingngé, angkanna tette'ko malolo pada-pada kuwajangngé.

⁶ Puwangnge pajoppai hukkungngé sibawa adélékengngé untu' sininna tau iya ritenre'é.

⁷ Napannessai rancana-Na lao ri Musa sibawa sining pangkauken-Na lao ri bangsa Israélié.

⁸ Saba' mamaséi Puwangnge sibawa makacuwai, malampé sabbara'i sibawa tabbolloi pammasé-Na.

⁹ Dé' namatteru-teru maggera', sibawa dé' namacai untu' mannennungeng.

¹⁰ Dé' nahukkukki situru dosata, iyaré'ga nawale'ki situru asalatta.

¹¹ Iyakiya sittanré langié polé ri linoé, silloppo iyaro pammasé-Na untu' tau mateppe'é.

¹² Sibbéla alau polé ri yajang, sibbéla iyaro Nabbéyangngi dosa-dosata.

¹³ Pada-pada séddié ambo' mamaséiwi ana'-ana'na, makkuwaniro Puwangnge mamaséiwi tau iya mateppe'é.

¹⁴ Saba' naisseng Puwangnge riyébbuki polé ri agaé, Naéngngerakki banna awumi.

¹⁵ Atuwonna tolinoé maponco'mi pada wellaé; tabbakkai pada-pada bungaé ri dare'é;

¹⁶ rékko nairii anging, lennye'ni, mala onronna dé'na nirissenna paimeng.

¹⁷ Iyakiya Puwangnge tette'i namaséi tau mateppe'é, akessingen-Na matterui massossoreng

¹⁸ lao ri tau iya makkatenningngé ri assijancin-Na, sibawa matinulué pogau'i parénta-Na.

¹⁹ Mapparéntai Puwangnge ri surugaé, Aléna arung iya makuwasaé ri yasé'na sini-sininnaé.

²⁰ Pojiwi Puwangnge, éh sining malaéka'-Na iya poré, iya méngkalingaéngngi sibawa pogau'i parénta-Na.

²¹ Pojiwi Puwangnge, éh sininna mahlu'é ri surugaé, sininna atan-Na iya pogau'éngngi élo-Na.

²² Pojiwi Puwangnge, éh sininna ripancajiyé ri sininna daéra akuwasan-Na. Pojiwi Puwangnge, éh nyawaku!