MAZMUR 102 - KITTA KAREBA MADECENG

Sempajang ri laleng asussang

¹ Sempajanna tau manrasa-rasaé iya engkaé ri laleng keadaang malemmaé maddarékéi lao ri Puwangnge.

² Oh Puwang, éngkalingai sempajakku, leppessanni pangobbiku lettu ri iko.

³ Aja' tagiling polé ri iyya rékko ri laleng asussakka. Engkalingai rékko mangobbika, sibawa balika masitta.

⁴ Teddengngi atuwokku pada-pada rumpué; mabbara buku-bukukku pada-pada apié.

⁵ Malemmaka pada-pada wella rakkoé, sibawa ateddéngeng napessu manré.

⁶ Maddarékéka sibawa macenno; watakkaléku oli mani nadoko buku.

⁷ Pada-padaka manu'-manu' undangngé ri padang kessi'é, pada-pada kacoci'é ri bola taja masino-sinoé.

⁸ Dé' naweddikka matinro, pada-pada manu'-manu' masino-sinoé ri pabbingeng bolaé.

⁹ Puppu esso napakatunaka balié; napancaji tanroi asekku tau iya macaié lao ri iyya.

¹⁰ Manréka awu pada-pada rotié, énungekku sicampuru'i uwai mata,

¹¹ saba' purani Muwakkaka sibawa maggenrungekka ri laleng cai-Mu iya malluwa'-luwa'é.

¹² Labe'i atuwokku pada-pada wajo-wajoé ri arawéngngé; makelle'ka pada-pada wellaé.

¹³ Iyakiya Iko, oh Puwang, Arung untu' mannennungeng, tette'i riyéngngerang massossoreng.

¹⁴ Tokkok-Ko matu sibawa mamaséiwi Sion, narapini wettunna untu' mamasé lao ri aléna.

¹⁵ Saba' ata-atam-Mu napojiwi, namuni mancajini ruttungeng. Marasa kasiyangngi mennang lao ri aléna, namuni mancaji awuni.

¹⁶ Naétauriwi matu bangsa-bangsaé akuwasanna Puwangnge; sibawa arajan-Na naétauri sininna arungngé,

¹⁷ rékko napatettongngi Puwangnge Sion paimeng, sibawa malluru ri laleng arajan-Na.

¹⁸ Naéngkalingai matu sempajanna umma'-Na iya kasiyasié, sibawa dé' nasampéyangngi paréllaunna mennang.

¹⁹ Okii sininna pangkaukenna Puwangnge untu' abbatireng iya mangoloé, kuwammengngi bangsa iya dé'éppa narijajiyang naulléi pojiwi Aléna.

²⁰ Makkitai Puwangnge polé ri onron-Na iya matanré, polé ri surugaé makkitai lao ri linoé

²¹ untu' méngkalingai addarékénna tau ritahangngé sibawa paleppe'i tau iya rihukkung maté.

²² Nariyabbirittang asen-Na ri Sion, Naripoji-pojiwi matu ri Yérusalém,

²³ wettunna maddeppungeng bangsa-bangsaé sibawa sining akkarungengngé untu' massompa lao ri Puwangnge.

²⁴ Napoloi Puwangnge awatangekku ri wettu malolo-Ku mupa, sibawa naponcokiwi umuru'ku.

²⁵ Nainappa makkedaka, “Oh Allataala aja' talai nyawaku ri pattengngang atuwokku.” Puwang, tuwo-Ko mannennungeng,

²⁶ riyolo Mupancajiwi linoé; muwi langié winru limam-Muto.

²⁷ Iya manennaro lennye'i matu, iyakiya Iko tette'i engka; iya manennaro malaungngi matu pada-pada pakéyangngé. Muwabbéyangngi matu pada-pada waju cowaé, naancuru maneng matu.

²⁸ Iyakiya Iko tette'ko pada, dé' naccappa matu atuwom-Mu.

²⁹ Tuwoi matu ana' eppota sibawa tennang, sibawa tuli amang ri laleng allinrungem-Mu.