MAZMUR 101 - KITTA KAREBA MADECENG

Jancinna séddié arung

¹ Mazmurna Daud. Maéloka makkélong passalenna atinulurengngé sibawa adélékengngé, untu' alé-Mu, oh Puwang, élong pappojiyakku!

² Maéloka puriatiwi atuwo-tuwong iya dé'é cellana. Uppanna polé-Ko ri iyya? Maéloka tuwo mapaccing ri bolaku,

³ dé' matu uleppessangngi jaé. Ucéccé pangkaukenna tau massakkaé, sibawa dé' umaélo makkéurusang sibawa mennang.

⁴ Dé' umaélo kédo macéko-céko sibawa dé' umaccowé ri laleng jaé.

⁵ Tau mappétenna'é sibawa mammekko-mekko upabbinasai matu. Tau matempoé sibawa matanré atié dé' matu uleppessangngi.

⁶ Upoji tau iya matinulué lao ri Allataala; weddingngi mennang monro ri bolaku. Tau iya tuwoé temmakkécella wedding tumanika.

⁷ Topabbengnguwangngé dé' nawedding monro ri bolaku; pabbelléngngé dé' matu natahang ri yoloku.

⁸ Polé ri essoé lao ri essoé maéloka paccappui sining tau majaé ri wanuwaéwé. Sininna tau iya pogau'é ja upallennye'i matu ri Kotana Puwangnge.