MATIUS 12 - KITTA KAREBA MADECENG

Pakkutana passalenna esso Saba'é

¹ Riséuwaé esso Saba', wettunna Yésus lalo riséddié dare' gandong, mammulani ana'-ana' gurun-Na mala gandong saba' malupui.

² Wettunna naita sining tau Farisiéro, makkedani mennang lao ri Yésus, “Itai! Ana'-ana' gurum-Mu majjalékkaiwi hukkunna agamata ri laleng napogau'na iya riyattéyangngé ri esso Saba'é.”

³ Nappébali Yésus, “Dé'paga naengka mubacai passalenna aga iya napogau'é Daud wettunna aléna sibawa sininna taunna malupu?

⁴ Muttama'i ri laleng Bolana Allataala, nainappa nanré roti iya puraé riyakkasuwiyangeng ri Allataala. Padahal manuru' hukkunna agamata, Daud sibawa sining taunnaro dé' nawedding nanré iyaro rotié – banna bawang sining imangngé wedding.

⁵ Iyaré'ga dé'paga naengka mubacai ri laleng Hukkunna Musa makkedaé tungke' esso Saba' sining imang iya majjamaé ri Bolana Puwangngé najjalékkaiwi peraturanna esso Saba'é, iyakiya dé' naripassala?

⁶ Pénessaiwi aga iya upowadaéwé: kuwaé engka iya lebbi battowaé naiya Bolana Puwangngé.

⁷ Ri laleng Kitta'é tarokii: Paressé babuwa ritu iya Uwéloriyé, tenniya akkarobangeng olokolo. Rékko mémeng mupahangngi tonget-tongeng adaéwé, pasti dé' mumaélo passalai sining tau iya dé'é napasala.

⁸ Nasaba Ana'na Tolinoé nakuwasaiwi esso Saba'é.”

Tau iya maté siwalié limanna

⁹ Nasalaini Yésus iyaro onrongngé nanalao riséddié bola assompang.

¹⁰ Kuwaro engka tau iya maté siwalié limanna. Siyagangngaré tau iya maéloé sappai asalanna Yésus, makkutana ri Aléna, “Weddigga ripajjappa tauwé ri esso Saba'é?”

¹¹ Nappébali Yésus, “Akkalarapanna engka séddi tau polé ri yelle'mu mappunnai séddi bimbala', na ri esso Saba'é iyaro bimbala'é sempé'i ri laleng kalebbong iya malamungngé; dé'ga naiyaro tau punnaé bimbala' makkuragai passui iyaro bimbala'é polé ri laleng kalebbongngéro?

¹² Nalebbi mangke'i rupatauwé naiya bimbala'é! Jaji, rékko makkuwaitu wedding ritulung tauwé ri esso Saba'é.”

¹³ Nainappa makkeda Yésus lao ri tau iya maté siwalié limanna, “Loro'i limammu.” Naloro'ni limanna iyaro tauwé, najjappana limanna iyaro tauwé pada-pada limanna siwalié.

¹⁴ Iyakiya sining tau Farisié nasalaiwi iyaro bola assompangngé, nasiyempe maélo mpunoi Yésus.

Suro iya napilé Allataala

¹⁵ Naisseng Yésus makkedaé iyaro sining tau Farisié majai akkattana lao ri Aléna. Jaji Nasalaini onrongngéro namaéga tau maccowériwi. Nanapajjappai sininna tau malasaé.

¹⁶ Iyakiya nattéyangngi mappaissengengngi passalenna Aléna lao ri tau laingngé.

¹⁷ Narimakkuwannanaro kajajiyanni aga napowada Allataala naolai Nabi Yésaya,

¹⁸ “Iyanaé suro-Ku Upilé, Tau iya Uwamaséiyé sibawa nasitujuiyé atik-Ku. Uwéréngngi matu Roh-Ku ri Aléna, Nabbirittangngi matu adélékek-Ku ri bangsa-bangsaé.

¹⁹ Dé' matu Nassasa iyaré'ga gora, iyaré'ga mappidatong risining watattanaé.

²⁰ Bulo iya nroko'é dé' matu Naripolo pajjennangeng iya mappiddé-piddéé dé' Naripeddéi. Méwai matu narapi Nalolongeng adélékengngé;

²¹ sininna bangsaé nataroi matu amménasanna ri Aléna.”

Yésus sibawa Béélzébul

²² Naritiwina ri Yésus séddi tau iya butaé sibawa pépé nasaba rikuwasaiwi ri sétangngé. Napajjappani Yésus iyaro tauwé angkanna naulléi mabbicara sibawa makkita.

²³ Hérang manenni tauwé nakkeda, “Makkulléga iyanaé Ana'na Daud iya riyajjanciyangngéro?”

²⁴ Wettunna naéngkalinga sining tau Farisié, mappébalini mennang, “Iyaé banna naulléi paddésu'i sétangngé, nasaba Béélzébul, kapalana sining sétangngé, pura mpéréngngi iyaro akuwasangngé lao ri Aléna.”

²⁵ Naissengngi Yésus pikkiranna sining tau Farisiéro. Jaji makkedani lao ri mennang, “Rékko séuwaé wanuwa tabbagéi ri laleng golongang-golongang iya sisullé simusu, dé' natahang matu iyaro wanuwaé. Na séddié kota iyaré'ga kaluwarga iya tabbagé-bagé sibawa simusu séddié sibawa laingngé ancuru' matu paggangkanna.

²⁶ Makkuwatoro ri laleng akkarungenna Ibillisi'é; rékko séddié kalompo' rukkai kalompo' laingngé, tabbagé-bagéi matti iyaro akkarungenna Ibillisi'é angkanna maruttung.

²⁷ Makkedako makkedaé Upaddésu'i sétangngé nasaba akuwasanna Béélzébul. Rékko makkuwaitu, nasibawang akuwasang niga ana'-ana' gurummu paddésu'i sétangngé? Aléna ana'-ana' gurummu pabuttiwi makkedaé salako!

²⁸ Iyakiya Iyya Upaddésu'i sétangngé sibawa akuwasanna Rohna Allataala. Bettuwanna iyaro makkedaé mappammulani Allataala mapparénta ri tengnga-tengngamu.

²⁹ Pékkugi tauwé naulléi muttama' ri lalempolana séddié tau iya mawatangngé untu' rampasa'i waramparanna, rékko dé' nasiyoi lebbi riyolo iyaro tau mawatangngé? Purapiro, nainappa naulléi rampasa'i waramparanna.

³⁰ Tau iya dé'é naccowé ri Iyya, sitongenna naéwa-Ka. Na tau iya dé'é nabantu-Ka, sitongenna nasolangiwi jama-jamak-Ku!

³¹ Rimakkuwannanaro, issengngi, rékko pogau'i dosa tauwé sibawa powada pappakatuna, weddingngi riyaddampengeng! Iyakiya rékko napakatunai Rohna Allataala dé' nawedding riyaddampengeng!

³² Rékko engka napowada tauwé méwai Ana'na Tolinoé, weddingngi riyaddampengeng, iyakiya rékko napakatunai Rohna Allataala, dé' nakkullé riyaddampengeng, muwi makkekkuwangngé iyaré'ga ri ahéra'.”

Pong ngajué sibawa buwa-buwana

³³ “Untu' lolongeng buwa iya makessingngé, harusu'i macommo' ponna. Rékko dé' namacommo ponna, dé'to namakessing buwana. Macommo' iyaré'ga dé'na séddié pong ngaju riissengngi polé ri buwana.

³⁴ Iko tau majako, pékkugi mulléi powadai gau'-gau' iya makessingngé rékko majako? Aga napowada iyaro témué massui polé ri atié!

³⁵ Tau makessingngé napowadai gau'-gau' iya makessingngé nasaba pennoi akessingeng. Sibalé'na tau iya majaé napowadai gau'-gau' iya majaé nasaba pennoi ja.

³⁶ Jaji, éngngerangngi: ri Esso Kiyame', tungke' tau harusu'i tanggung jawakiwi tungke' ada-adanna iya dé'é nakkéguna.

³⁷ Saba'ada-adammu ritu ripaké matu pettuiwi pasalakoga iyaré'ga dé'.”

Sining tau Farisié méllauwi Yésus pogau' anu makalallaing

³⁸ Nainappa siyagangngaré guru agama sibawa tau Farisi makkeda, “Pa' Guru, macinnaki mitai Bapa' mébbu anu makalallaing.”

³⁹ Nappébali Yésus, “Temmaka jana sibawa dorakana sining tauwé wettuéwé! Muwéllau-Ka mébbu anu makalallaing? Dé' matu nariwérékko anu makalallaing, muwi séddi, sangadinna anu makalallainna Nabi Yunus.

⁴⁰ Monroi Yunus tellung ngesso tellumpenni ri lalenna babuwana balé loppoé. Makkuwatoro Ana'na Tolinoé monroi matu tellung ngesso tellumpenni ri lalenna babuwana tanaé.

⁴¹ Ri Esso Kiyame', moto'i matu pabbanuwana Niniwé silaong sining tauwé makkekkuwangngéwé nanatenre'i mennang. Saba' toba'ni tau Niniwé polé ri dosana, wettunna Yunus makkatobba lao ri mennang. Iyakiya makkekkuwangngé kuwaé engka lebbi battowa naiya Yunus!

⁴² Ri Esso Kiyame', tokkongngi matu ratu polé ri wanuwa yattangngé silaong sining tauwé makkekkuwangngé nanatenre'i mennang. Saba' untu' méngkalingai pangajana Salomo iya mapanré, iyaro ratué joppai mabéla senna polé ri cappa'na linoé. Iyakiya makkekkuwangngé kuwaé engka lebbi battowa naiya Salomo!”

Lisunnana roh majaé

⁴³ “Rékko roh majaé nasalaiwi séddié tau, iyaro roh-é mattuliliwi risining onrong marakkoé untu' sappa onrong mappésau, iyakiya dé' nalolongengngi.

⁴⁴ Rimakkuwannanaro makkedai, ‘Maéloka lisu ri bola iya puraé usalai.’ Wettunna lettu kuwaro, iyaro bolaé lobbanni, mapaccing sibawa taratoro'.

⁴⁵ Nalaona sibawa tiwi pitu roh laing iya lebbi majaé naiya aléna. Nainappa muttama' ri lalenna tauwéro, naonro kuwaro. Na angkanna keadaanna iyaro tauwé lebbi majani naiya pammulanna. Iyatonaro kajajiyang matu sibawa sining tau majaé wettuéwé.”

Indo'na sibawa silessu-silessurenna Yésus

⁴⁶ Wettunna Yésus mabbicara mupi sibawa tau maégaéro, poléni indo'na sibawa silessu-silessuren-Na. Tettongngi mennang ri saliweng nanakkuragato untu' mulléi mabbicara sibawa Aléna.

⁴⁷ Séddi tau polé ri tau maégaéro makkeda lao ri Yésus, “Pa', indo' sibawa silessu-silessurenna Bapa' engkai ri saliweng. Macinnai mennang mabbicara sibawa Bapa'.”

⁴⁸ Nappébali Yésus, “Niga indo'-Ku? Niga silessu-silessurek-Ku?”

⁴⁹ Nainappa majjello' lao ri ana'-ana' gurun-Na sibawa makkeda, “Iyanaé indo' sibawa silessu-silessurek-Ku.

⁵⁰ Tau iya pogau'éngngi élona Ambo'-Ku ri surugaé, aléna ritu silessureng worowané, silessureng makkunrai, sibawa indo'-Ku.”