LUKAS 8 - KITTA KAREBA MADECENG

Makkunrai-makkunrai iya tulungngéngngi Yésus

¹ Dé' namaitta ri munrinna, laoni Yésus ri kota-kotaé sibawa ri kampong-kampongngé, untu' mabbirittangngi Karéba Madécéngngé makkedaé Allataala mappammulani mapparénta selaku Arung. Iya seppulo duwa ana' gurun-Na maccowé towi silaongengngi.

² Makkuwatoro siyagangngaré makkunrai iya puraé ripajjappa polé ri roh majaé sibawa lasaé. Iyanaritu Maria iya riyasengngé Magdaléna (pitu sétang pura ripassu polé ri aléna);

³ makkuwatoro Yohana, bainéna Khuza, pegawé saorajana Hérodés; Susana sibawa maéga mupa makkunrai laingngé. Nanabantui mennang Yésus sibawa ana'-ana' gurun-Na sibawa ongkoso' aléna.

Pakkalarapangeng pangampo

⁴ Matteru-terui sining tauwé lao ri Yésus polé rimaddupa-rupang kota. Na wettunna maégani tau maddeppungeng, nacuritani Yésus lao ri mennang pakkalarapangeng makkuwaéwé:

⁵ “Engka séddi pangampo lao mampo biné. Wettunna mampo, engka biné teppa ri lalengngé. Sibagiyang naléjja tauwé na laingngé nanréi manu'-manu'.

⁶ Engkato teppa ri onrong mabbatu-batué. Wettunna massu cura'-cura'na iyaro biné, makelle'i nasaba marakkoi tanana.

⁷ Engkato biné teppa ri tengngana alekale' maddorié. Iyaro alekale' maddorié tuwoi silaong iyaro biné, sibawa nalimpenginna angkanna dé' naulléi mabbuwa.

⁸ Iyakiya engkato biné teppa ri tana macommo'é, natuwo sibawa powassélé' buwa leppe' wékkasératu.” Puranana nacurita pakkalarapangengngéro, makkedani Yésus, “Rékko mappunnaiko daucculing, éngkalingai!”

Magi Yésus napaké pakkalarapangeng

⁹ Nakkutanana ana'-ana' gurunna Yésus lao ri Yésus aga bettuwanna pakkalarapangngéro.

¹⁰ Nappébali Yésus, “Purano riwéréng pammasé untu' missengngi rahasiyana pékkugi Allataala mapparénta selaku Arung. Iyakiya tau laingngé ripaggurui sibawa pakkalarapangeng, kuwammengngi napénessaiwi, iyakiya dé' naissengngi aga iya kajajiyangngé; sibawa maréngkalingai, iyakiya dé' napahang.”

Yésus pakatajangngi pakkalarapangeng passalenna séddié pangampo

¹¹ “Iyanaé bettuwanna iyaro pakkalarapangngé: Iyaro biné iyanaritu ada-adanna Allataala.

¹² Biné iya teppaé ri lalengngé sinrupai sining tau iya méngkalingaéngngi ada-adaéro. Iyakiya poléi Ibillisi' nanarampasa'i iyaro karébaé polé ri atinna mennang, kuwammengngi naaja' namateppe' sibawa ripassalama'.

¹³ Biné iya teppaé ri onrong iya mabbatu-batué sinrupai tau iya ri wettu naéngkalingana iyaro karébaé, natarimai sibawa masennang atinna. Iyakiya iyaro karébaé dé' nakkure' ri laleng atinna. Cinampe'mi bawang mateppe', ri wettu poléna paccobangngé massakkai mennang.

¹⁴ Biné iya teppaé ri tengngana alekale' maddorié sinrupai tau iya méngkalingaéngngi iyaro karébaé, iyakiya bata-batai passalenna atuwonna mennang enrengngé macinnana tuwo massennas-sennang sibawa napojinna ri laleng linoéwé. Iya manennaro sipii mennang angkanna dé' napowassélé' buwa iya matasa'é.

¹⁵ Biné iya teppaé ri tana macommo'é sinrupai tau iya méngkalingaéngngi iyaro karébaé, sibawa natarona ri laleng atinna iya makessingngé namalempu. Mattahangngi mennang narapi powassélé' buwa.”

Pajjennangeng iya ritongkoé sibawa baku

¹⁶ “Dé'gaga tau palluwa pajjennangeng nainappa natongko baku, iyaré'ga nataroi ri yawana onrong atinrongngé. Iyakiya nataroi ri yasé'na ajé pajjennangengngé, kuwammengngi tau iya muttama'é naulléi mitai tajanna.

¹⁷ Dé'gaga tassubbu dé' napaita matu; sibawa dé'gaga rirahasiyakang dé' naribongkara' sibawa riisseng matu.

¹⁸ Rimakkuwannanaro pénessaiwi madécéd-décéng aga muwéngkalinga. Saba' tau iya mappunnaiyénna riwéréngngi matu lebbi maégapa; iyakiya tau iya dé'é nappunnai, céddé iya engkaé ri aléna riyalai matu.”

Indo'na sibawa silessu-silessurenna Yésus

¹⁹ Laoni ri Yésus indo'na sibawa silessu-silessuren-Na, iyakiya dé' naulléi lettu ri Yésus nasaba maéga senna' tau.

²⁰ Na engka séddi tau makkeda ri Yésus, “Pa', indo'-Mu sibawa silessu-silessuremmu Pa' engkai ri saliweng. Macinnai sita Bapa'.”

²¹ Iyakiya makkedai Yésus lao ri mennang, “Sining tau iya méngkalingaéngngi ada-adanna Allataala sibawa napogau'na, iyanaritu indo' sibawa silessu-silessurek-Ku.”

Napappajana Yésus anginrajaé

²² Riséuwaé esso, Yésus sibawa ana'-ana' gurun-Na mallopiwi. Nakkeda Yésus lao ri mennang, “Laono mai talliweng ri tapparengngé.” Najoppana mennang.

²³ Mattengngangngi mennang sompe, namatinro Yésus. Tappa natappo' muni anginraja iyaro tapparengngé. Mammulani muttama' uwai ri laleng lopié, angkanna bahaya manenni mennang.

²⁴ Laoni ana'-ana' gurunna Yésus ri Yésus nateddui. Makkedani mennang, “Pa' Guru, Pa' Guru, nakennaki abala!” Moto'ni Yésus nanagera'i angingngé sibawa bombangngé iya siyappo-appo'é. Napajana angingngé sibawa bombangngé, tennang senna'ni iyaro tapparengngé.

²⁵ Nakkeda Yésus lao ri ana'-ana' gurun-Na, “Magi nadé' mumateppe lao ri Iyya?” Héranni mennang sibawa métau. Nakkedana mennang séddié lao ri laingngé, “Niga sitongenna iyaé tauwé, nariturusi paréntana ri angingngé sibawa bombangngé!”

Yésus pajjappai tau iya nauttamakiyé roh majaé

²⁶ Sompe'ni Yésus sibawa ana'-ana' gurunna matteru lettu ri daéra Gerasa ri liwenna Tappareng Galiléa.

²⁷ Wettunna Yésus nonno ri pottanangngé, rilokkaini riséddié tau worowané iya nauttamakiyé roh maja. Iyaro tauwé poléi ri kotaé. Maittani dé' naengka nappakéyang sibawa dé' namaélo monro ri bolaé. Ri gowa-gowaé bawang onrong attampungengngé maélo monro.

²⁸ Wettunna naita Yésus, gorani nainappa suju' ri yolona Yésus sibawa mangobbi, “Yésus Ana'na Allataala Iya Pommatanré! Maélo-Ko magaka? Uwéllauwi aja' mucallaka!”

²⁹ Iyaro tauwé makkeda makkuwairo nasaba Yésus suroi iyaro sétangngé massu polé ri aléna. Biyasani rikuwasai ri sétangngéro, angkanna muni risiyo limanna kuwaéttopa ajéna sibawa ranté nenniya rijagainna tonget-tongeng, naulléto pettuiwi iyaro ranté nainappa ritiwi ri sétangngéro ri padang kessi'é.

³⁰ Nakkutana Yésus lao ri tauwéro, “Niga asemmu?” Nappébali iyaro tauwé, “Asekku ‘Legiun’,” – saba' engka maéga sétang muttama' ri laleng aléna.

³¹ Iyaro sining sétangngé naéllauwi sibawa masero kuwammengngi dé' naripaddésu' ri Yésus lao ri laleng Balorang Amaténgngé.

³² Ri seddéna onrongngéro engka maéga senna' bawi iya mattengngangngé makkinanré ri émpenna bulu-bulué. Iyaro roh-roh majaé naéllauwi sibawa masero lao ri Yésus kuwammengngi na ripalalo muttama' ri laleng sining bawiéro. Nanasitujuini Yésus.

³³ Nanassuna iyaro roh-roh majaé polé ri tauwéro nanauttama ri laleng sining bawiéro. Nainappa iyaro sining bawié larini nanaluppe polé ri wiring balorangngé muttama' ri tapparengngé, natallemme.

³⁴ Naitanana iyaro sining panganrowang bawié aga kajajiyang, larini nanappallebbangengngi iyaro karébaé ri kotaé sibawa ri désa-désaé ri seddéna.

³⁵ Nanassuna sining tauwé untu' mitai aga kajajiyang. Laoni mennang ri Yésus, nanapoléini mennang kuwaro tau iya puraé ripaleppe' polé risining sétangngé tudang ri seddé ajéna Yésus, mappakéyanni sibawa mainge'ni. Métauni mennang.

³⁶ Nacuritani mennang iya mitaéngngi kajajiyangngéro lao risining tauwé pékkugi iyaro tauwé ripajjappa.

³⁷ Nainappa iyaro sininna pabbanuwana Gerasa naéllauni sibawa masero kuwammengngi nasalaiwi Yésus iyaro onrongngé, saba' métau senna' manenni mennang. Jaji ménré'ni Yésus ri lopié maélo lisu.

³⁸ Tau iya puraé ripaleppe' polé risining sétangngéro naéllauwi ri Yésus kuwammengngi naweddingngi maccowé. Iyakiya Yésus suroi lao, adanna,

³⁹ “Lisuno namuwabbirittangngi aga pura napogau' Allataala lao ri iko.” Nanalaona iyaro tauwé mappaissengengngi ri kotaé, aga pura napogau' Yésus lao ri aléna.

Ana'na Yairus – Makkunrai iya géssaéngngi Yésus

⁴⁰ Wettunna Yésus lisu ri liweng tappareng, masennanni sining tauwé duppaiwi nasaba ritajengngi ri mennang.

⁴¹ Napoléna séddi tau, kapalana bola assompangngé ri onrongngéro. Asenna Yairus, suju'ni ri yolona Yésus naéllauwi sibawa masero kuwammengngi nalao Yésus ri bolana,

⁴² nasaba séddi-séddinna ana' makkunrainna iya seppuloé duwa taung umuru'na céddé'pi namaté. Wettunna Yésus joppa lao ri bolana Yairus, sining tauwé redde'i Yésus polé tulili.

⁴³ Na ri yelle'na engkato séddi makkunrai iya seppuloénna duwa taung malasa maddara. Purani napaccappu sininna appunnangenna untu' mabbura ri dottoro'é, iyakiya dé'gaga mulléi pajjappai.

⁴⁴ Iyaro makkunraié naddeppérini Yésus polé monri, nanagéssai cappa jumbana. Iyatoro wettué nappésau massu darana iyaro makkunraié.

⁴⁵ Nakkutana Yésus, “Niga géssaka?” Nassakka maneng tauwé. Nanakkeda Pétrus, “Pa', maéga senna' tau mattulilingiwi Bapa'; naredde'i mennang Bapa'!”

⁴⁶ Nakkeda Yésus, “Iyakiya engka tau géssaka. Uwisseng saba' engka awatangeng massu polé ri Iyya.”

⁴⁷ Naissenni iyaro makkunraié makkedaé riissenni pangkaukenna. Jaji laoni sibawa ténré nasuju' ri yolona Yésus. Nacuritani ri yolona sininna tauwé, magi nagéssai Yésus, sibawa majjappana lasana iyatoro wettué.

⁴⁸ Nakkeda Yésus lao ri makkunraiéro, “Ana'-Ku, nasaba mateppe'ko ri Iyya, majjappako. Laono sibawa salama'.”

⁴⁹ Ri wettu mabbicarana mupa Yésus, engkasi séddi tau risuropa polé ri bolana Yairus. Makkedai lao ri Yairus, “Maténi Puwang ana' makkunraitta. Aja'na tasussaiwi Bapa' Guru.”

⁵⁰ Wettunna Yésus naéngkalingaro, makkedani lao ri Yairus, “Aja' mumétau. Ateppe'no bawang pasti majjappa matu ana'mu.”

⁵¹ Lettu'nana ri bolana Yairus, dé' napalaloi Yésus muwi séddi tau muttama' sibawa aléna sangadinna Pétrus, Yohanés, Yakobus sibawa indo' ambo'na iyaro ana'é bawang.

⁵² Teri maneng tauwé sibawa mpating nasaba maténana iyaro ana'é. Iyakiya makkedai Yésus, “Aja' muteri. Iyaro ana'é dé' namaté, matinromi bawang!”

⁵³ Nacawa-cawaini mennang Yésus, nasaba naissenni mennang maténi iyaro ana' makkunraié.

⁵⁴ Nainappa nakkatenninni Yésus limanna iyaro ana'é sibawa makkeda, “Oto'na na'!”

⁵⁵ Lisuni nyawana iyaro ana'é, na iyatoro wettué naoto. Purairo nasuroni Yésus mennang mpéréngngi nanré iyaro ana'é.

⁵⁶ Hérang senna'ni tomatowanna ana'éro. Iyakiya riyattéyangngi ri Yésus nappaissengengngi gau'éro lao ri nigi-nigi.