LUKAS 23 - KITTA KAREBA MADECENG

Yésus ri yolona Pilatus

¹ Tettong manenni iyaro tau maddeppungengngé, nanatiwii Yésus ri yolona Pilatus.

² Nakkuwanaro mennang mappammula tenre'i. Makkedani mennang, “Rilolongengngi iyaé tauwé papusai ra'ya'é. Napangarai tauwé kuwammengngi aja' nakkamaja sima lao ri Kaisar, saba' adanna Aléna iyanaritu Kristus, séddiwi arung.”

³ Nakkutana Pilatus lao ri Yésus, “Tongek-Koga Arunna tau Yahudié?” Nappébali Yésus, “Makkuwaitu adatta puwang.”

⁴ Nakkeda Pilatus lao ri kapala-kapala imangngé sibawa tau maégaéro, “Dé' ulolongeng muwi séddi asalang ri tauwéwé untu' hukkungngi.”

⁵ Iyakiya pédé' maddessa'i mennang, “Pappagguruwan-Na pangarai tauwé ri sininna Yudéa; mula-mulanna ri Galiléa, namakkekkuwangngé lettu toni kuwaé.”

Yésus ri yolona Hérodés

⁶ Wettunna naéngkalinga Pilatus iyaro, makkutanani, “Aga iyaé tauwé tau Galiléa?”

⁷ Ripowadannana makkedaé assalenna Yésus poléi ri daéra iya ri yawa paréntanaé Hérodés, nakirinni Pilatus Yésus lao ri Hérodés, iya wettuéro engka towi ri Yérusalém.

⁸ Masennang senna'ni Hérodés wettunna naita Yésus, saba' maittana naéngkalingai passalenna Yésus sibawa macinnana mitai Yésus pogau' anu makalallaingngé.

⁹ Rimakkuwannanaro maéga nakkutang ri Yésus, iyakiya dé' sises-siseng nappébali Yésus.

¹⁰ Kapala-kapala imangngé sibawa guru-guru agamaé mangolo towi kuwaro sibawa tenre'i Yésus.

¹¹ Hérodés sibawa anggota-anggota tentarana nacculé-culéiwi sibawa napakatunai Yésus, nainappa napappakéi pakéyang maraja, nanakiringngi lisu ri Pilatus.

¹² Iyatoro essoé Hérodés sibawa Pilatus, iya simusué riyolo, massellaoni paimeng.

Ripakennainna Yésus pahukkungeng maté

¹³ Napaddeppungenni Pilatus kapala-kapala imangngé, sining pamimpingngé sibawa ra'ya'é,

¹⁴ nainappa makkeda lao ri mennang, “Mutiwii iyaé Tauwé lao ri iyya sibawa makkeda makkedaé Napapusai sining tauwé. Makkekkuwangngé purani uparéssa ri yolomu, iyakiya dé' sises-siseng ulolongengngi séddi ja iya muteppuwangngéngngi.

¹⁵ Makkuwatoro pallolongenna Hérodés, saba' nasuro towi Yésus lisu paimeng ri idi. Iyaé tauwé dé'gaga napogau' iya nasitinajaiyé rihukkung sibawa pahukkungeng maté.

¹⁶ Rimakkuwannanaro maéloka barasa'i nainappa uleppessang.” [

¹⁷ Tungke' ramé-ramé Paska, harusu'i Pilatus leppessang séddi tau tarungku untu' ra'ya'é.]

¹⁸ Gorani sininna tauwé iya maddeppungengngé kuwaro, “Unoi! Leppessangengngi Barabas!” (

¹⁹ Ritarungkui Barabas nasaba ronta kajajiyangngé ri kotaé sibawa nasaba abbunowang.)

²⁰ Maéloi Pilatus leppessangngi Yésus, rimakkuwannanaro mabbicarapi siseng lao ri tau maégaéro.

²¹ Iyakiya gorai mennang, “Sallii! Sallii!”

²² Na untu' mabbékkatellunna Pilatus gora lao ri mennang, “Iyakiya aga asalan-Na? Dé' asalang ulolongeng ri Aléna muwi séddi iya nasitinajaiyé rihukkung sibawa pahukkungeng maté! Maéloka barasa'i, nainappa leppessangngi.”

²³ Iyakiya matteru-terui mennang gora siullé-ulléna makkedaé harusu'i Yésus risalli. Na angkanna makkéwassélé gorana mennang.

²⁴ Napateppaini Pilatus pahukkungeng maté Yésus situru élona sining tauwéro,

²⁵ sibawa leppessangngi tau iya naéllauwé mennang, iyanaritu tau iya ritarungkué nasaba maronta'na sibawa abbunowanna. Nainappa nabbéréyang Yésus lao ri mennang untu' rigaukeng siélo-élona mennang.

Risallina Yésus

²⁶ Naritiwina Yésus ri mennang. Siruntu'ni mennang ri tengnga laleng séddi tau iya riyasengngé Simon, iya assalennaé poléi ri Kiréné, iya muttama'é ri kotaé. Natikkenni mennang, nainappa napassa méssangngi aju salliéro ri monrinna Yésus.

²⁷ Maégato tau maccowé joppa ri munrinna Yésus – ri yelle'na engkato sining makkunrai. Iyaro sining makkunraié nateringini sibawa nawatingi Yésus.

²⁸ Iyakiya gilingngi Yésus ri mennang sibawa makkeda, “Eh sining makkunrai Yérusalém! Aja' muteringi-Ka. Teringiwi alému sibawa ana'-ana'mu.

²⁹ Saba' engka matu napolé wettunna nakkeda tauwé, ‘Temmaka upe'na sining makkunrai iya dé'é naengka nappunnai ana', iya dé'é naengka naémmana' sibawa dé' naengka napasusu ana'lolo!’

³⁰ Ri wettuénnaro nakkeda matu tauwé lao ri bulué, ‘Geppaki!’ Sibawa lao ri bulu-bulué, ‘Timpukki!’

³¹ Saba' rékko lao ri pong ngaju iya tuwoé mupa, napogau'i tauwé pada-padaéwé, agaré' tosi nagaukengngi matu mennang lao ri aju iya marakkoénna!”

³² Engkato duwa tau laing – tau maja duwa – iya natiwié mennang untu' rihukkung maté silaong Yésus.

³³ Wettunna lettu ri onrong iya riyasengngé “Tengkora”, nasallini mennang Yésus sibawa iya duwa tau majaéro – séddi ri seddé ataunna sibawa séddi ri seddé abéyona Yésus.

³⁴ Nassempajanna Yésus, “Ambo', addampengengngi mennang! Dé' naissengngi mennang aga napogau'.” Nabagé-bagéni kuwaro pakéyanna Yésus ri yelle'na mennang sibawa naloteréi.

³⁵ Pada tettonni tauwé kuwaro makkita-ita, nasining pamimpinna Yahudié méllékéllé'i Yésus sibawa makkeda, “Purani napassalama' tau laingngé; cobani makkekkuwangngé passalama'i alé-Mu, rékko tonget-tongengngi Arung Pappassalama' iya napilé Allataala!”

³⁶ Prajuri'-prajuri'é méllékéllé towi. Poléi mennang nanawéréngngi anggoro kecci

³⁷ sibawa makkeda, “Rékko arunna-Ko tau Yahudié, passalama'ni alé-Mu!”

³⁸ Ri coppo'na aju sallina Yésus, tarokii ada-adaéwé: “Iyanaé Arunna Tau Yahudié.”

³⁹ Sala séddinna tau maja iya risallié kuwaro cella-cellai Yésus. Makkedai, “Arung Pappassalama'-Koto? Nah, passalama'ni alé-Mu sibawa idi!”

⁴⁰ Iyakiya tau maja séddié mamparengngi, adanna, “Dé'ga mumétau ri Allataala? Pada-padako rihukkung maté.

⁴¹ Iyakiya pahukkungetta idi duwa mémeng siwale' pangkauketta. Iyakiya Alénaro dé' napasala!”

⁴² Nainappa makkeda lao ri Yésus, “Yésus, éngngerakka, rékko polé-Ko selaku Arung!”

⁴³ Nakkeda Yésus lao ri tauwéro, “Ateppe'no, iyaé essoé sibawakko matu Iyya ri Firdaus.”

Amaténna Yésus

⁴⁴ Kira-kira tetté seppulo duwa tangassoé, dé'na nattappa essoé, namapettang siseng sininna wanuwaé narapi tetté tellu arawéngngé.

⁴⁵ Kaing paddenring iya taggattungngé ri laleng Bolana Puwangngé, sapé' mancaji duwa.

⁴⁶ Nagora Yésus sibawa sadda battowa, “Ambo'! Ri laleng limam-Mu Uwabbéréyang alé-Ku!” Purana makkeda makkuwaro, maténi.

⁴⁷ Wettunna naita parawira tentaraé aga pura kajajiyang, napojini Allataala. Nakkeda, “Dé' tongeng Napasala iyaro tauwé!”

⁴⁸ Tau maégaé iya laowé kuwaro makkita-ita, naitani aga kajajiyang. Lisu manenni mennang sibawa massesse kalé.

⁴⁹ Nasininna sissenna Yésus, muttama' toni sining makkunrai iya maccowériyéngngi polé ri Galiléa, mabélai tettong mita manengngi iyaro.

Rikuburu'na Yésus

^50-51 Engka séddi tau riyaseng Yusuf, iya assalennaé poléi ri kota Arimatéa ri wanuwa Yudéa. Séddiwi tau makessing iya napakalebbié tauwé sibawa iya tajengngéngngi wettunna Allataala mappammula mapparénta selaku Arung. Namuni anggotanai Mahkamana Agamaé, dé' nasitujuiwi apettunna sibawa tindakanna iyaro mahkamaé.

⁵² Iyaé Yusuf, laoni mangolo ri Pilatus sibawa naéllaunna kuwammengngi nariwéréng ujuna Yésus.

⁵³ Nainappa napanonno ujuna Yésus polé ri aju sallié, nainappa nadoko sibawa kaing walu polé ri kaing lénangngé. Purairo napalénne'ni ri laleng tampung iya riyébbué ri laleng bulu-bulu batué – iyaro tampungngé dé'pa naengka naripaké.

⁵⁴ Iyaro essoé, esso Jumai; namawé'ni esso Saba'é.

⁵⁵ Sining makkunrai iya silaongngé Yésus polé ri Galiléa naccowérini Yusuf sibawa mitai iyaro tampungngé. Naita towi mennang pékkugi ujuna Yésus ripalénne ri laleng tampungngé.

⁵⁶ Nainappa lisu mennang passadiya rampa-rampa sibawa minnya' wangi untu' minnyakiwi ujuna Yésus. Ri esso Saba'é, mappésauni mennang majjama untu' turusiwi parénta-paréntana agamaé.