LUKAS 12 - KITTA KAREBA MADECENG

Papparéngngerang untu' tau munapé'é

¹ Massebbu-sebbu tau siredde-redde angkanna engka riléjja-léjja ajéna. Ri wettu makkapulunna mupa iyaro tauwé, makkedani Yésus lao ri ana'-ana' gurun-Na, “Atutuko lao ri raginna tau Farisié, akkatta-Ku, amunapékenna mennang.

² Dé'gaga tassubbu dé' napaita matu, sibawa dé'gaga rirahasiyakang iya dé'é naribongkara' matu.

³ Iya mupowadaé ri wennié, riyéngkalingai matu ri essoé; sibawa iya Muwabbicikengngé ri daucculinna tauwé ri laleng bili' tattutu'é, riyappallebbangengngi matu silowang-lowanna.”

Etauko ri Puwangngé

⁴ “Engngerangngi, sellao-sellao-Ku! Aja' mumétau lao ri mennang iya mpunoéngngi watakkalé iyakiya dé' naulléi mappogau' lebbi naiyaro.

⁵ Madécéngengngi Upaitakko niga harusu' muwétauri. Etauko ri Allataala! Saba' purana mabbuno, makuwasa towi buwangngi ri laleng ranakaé! Ateppe'no, Aléna ritu harusu' muwétauri.

⁶ Limakkaju dongi ribalu' duwa dowi iya kaminang baiccu'é. Namuni makkuwaro dé' séddi nallupai Allataala.

⁷ Gemme' ri ulummu pura ribilang manetto, rimakkuwannanaro aja' mumétau; lebbi mangke'ko naiya sining dongiéro!”

Mangakuiwi Kristus ri yolona tau maégaé

⁸ “Engngerangngi madécéd-décéng: Tau iya mangakué ri yolona tau maégaé makkedaé ana' guruk-Kui, riyangakui towi matu ri Ana'na Tolinoé ri yolona sining malaéka'na Allataala.

⁹ Iyakiya tau iya massakkaé ri yolona tau maégaé makkedaé ana' guruk-Kui, riyassakkareng towi matu ri Ana'na Tolinoé ri yolona sining malaéka'na Allataala.

¹⁰ Rékko engka napowada tauwé iya méwaéngngi Ana'na Tolinoé, weddingngi riyaddampengeng; iyakiya rékko napakatunai Rohna Allataala, dé' nawedding riyaddampengeng.

¹¹ Rékko ritiwiko risining bola assompangngé untu' riadéléki ri yolona pamaréntaé iyaré'ga tomakuwasaé, aja' mubata-bata passalenna pékkugiko harusu' méwaiwi alému iyaré'ga passalenna aga harusu' mupowada.

¹² Saba' aga iya harusu'é mupowadaro nappagguruwangngi matu Rohna Allataala ri iko ri wettunna.”

Pakkalarapangeng tau sugi iya madonggoé

¹³ Engka séddi tau polé ri yelle'na tau maégaéro makkeda ri Yésus, “Bapa' Guru, cobasai Bapa' suroi silessurekku mpérékka sibagiyang polé ri waramparang nasalaiyé ambo'ta.”

¹⁴ Nappébali Yésus, “Eh saudara, niga makka-Ka mancaji haking iyaré'ga pabbagé mana ri yelle'ta sipadduwa?”

¹⁵ Nainappa lao ri sininna tauwé iya engkaé kuwaro makkedai Yésus, “Atutuko sibawa atike'ko, aja' namumangowa. Saba' atuwonna rupa tauwé dé' nataggattung polé ri asugirenna, namuni tabbollompollongngi waramparanna.”

¹⁶ Nainappa nacuritani Yésus iyaé pakkalarapangngé, “Engka séddi tau sugi. Iya mappunnaiyé tana iya mappapolé maéga wassélé'.

¹⁷ Iyaro tau sugié mamulani mappikkiri' ri laleng atinna, ‘Dé'na gaga onronna wassélé tanaku. Agana akkalekku makkekkuwangngé?’

¹⁸ Nainappa mappikkiri'si sibawa makkeda lao ri aléna, ‘Nah, engka akkalekku; maéloka massuro ruttungngi sining gudakku nainappa upatettong iya lebbi battowaé. Kuwaniro matu utaro sininna gandokku sibawa barab-barakku laingngé.

¹⁹ Nainappaka makkeda lao ri aléku: Maupe'ko! Sininna iya makessingngé, uwappunnangini dé'na matu nacappu mattaut-taung ittana. Appésauno makkekkuwangngé! Manré ménunno sibawa péneddingini atuwommu!’

²⁰ Iyakiya makkedai Allataala lao ri tauwéro, ‘Eh donggo! Iyato wennié mumaté matu, na nigana matu lolongengngi sininna asugireng iya puraé mupaddeppungengngi alému?’

²¹ Makkuwaniro jajinna tungke' tau iya makkuragaé mancaji sugi untu' aléna, iyakiya dé' nakkuraga mancaji sugi ri matanna Allataala.”

Ateppe'no lao ri Allataala

²² Nakkeda Yésus lao ri ana'-ana' gurun-Na, “Iyanaro saba'na Uwakkeda, ‘Aja' mubata-bata passalenna atuwommu, iyanaritu aga iya maéloé muwanré, iyaré'ga iya maéloé mupaké.’

²³ Atuwongngé iyanaritu lebbiwi naiya anré, sibawa watakkalé lebbiwi naiya pakéyangngé.

²⁴ Pénessaiwi kao-kaoé! Dé' nattaneng mennang, dé' naéngngala, dé'to nappunnai gudang iyaré'ga lappo. Iyakiya ripiyarai mennang ri Allataala! Iko lebbi mangke'ko naiya manu'-manu'éro!

²⁵ Nigana ri yelle'mu iya ri laleng abata-batanna mullé palampériwi umuru'na namuni céddé?

²⁶ Rékko iyaro gau' baiccu'é bawang dé'na mulléi pogau'i, magi mubata-bata passalenna gau'-gau' laingngé?

²⁷ Pénessaiwi pékkugi bunga-bunga bakungngé tuwo; iyaro bunga-bungaé dé' najjama, dé'to natennung. Iyakiya namuni Arung Salomo iya sugi makkuwaéro dé'to napaké pakéyang iya siggelloé bunga-bungaéro!

²⁸ Wellaé ri padangngé tuwoi essoéwé napappa bajana cappui ritunu. Iyakiya Allataala bélo-béloiwi iyaro wellaé magello makkuwaro! Apalagi iko! Iyakiya iko makurang teppe'ko!

²⁹ Jaji, aja' mubata-bata iyaré'ga bengnga passalenna aga maélo muwanré sibawa muwénung.

³⁰ Gau'-gau' pada-padaéro nalellungngi tau iya dé'é naissengngi Allataala. Padahal naisseng Ambo'mu makkedaé muwapparelluwang manengngi iyaro.

³¹ Iyakiya harusu'ko makkuraga kuwammengngi naparéntai Allataala atuwommu, naiyaro laingngé nawéréng tokko matu Allataala.”

Waramparang ri surugaé

³² “Iko iya céddé'mi jumellamu, aja' mumétau! Saba' masennang Ambo'mu mpérékko barakka polé ri Apparéntan-Na.

³³ Balu'ni appunnangemmu, namuwéréngngi ellinna tau kasiyasié. Ebburengngi alému tase'-tase' iya dé'é nawedding malaung, iyanaritu waramparang ritaroé ri surugaé. Iyaro waramparangngé dé' naulléi teddéng nasaba dé' naulléi pangaé malai sibawa dé' naulléi solangi karat.

³⁴ Saba' kégi waramparammu, kuwa towitu atimmu!”

Pattumani iya tuli sadiyaé

³⁵ “Jaga-jagako moloiwi tungke' gau'. Harusu'ko tuli sadiya mappakéyang sibawa pura ripalluwa pajjennangemmu,

³⁶ pada-pada sining pattumani iya sadiyaé tajengngi puwanna lisu polé ri abottingengngé. Rékko lisui iyaro puwangngé sibawa getto'i tange'é, masitta'i matu mennang timpa'i tange'é.

³⁷ Temmaka upe'na sining pattumani iya ripoléiyé mattajeng ri wettu poléna puwanna. Ateppe'no: iyaro puwanna sadiya-sadiyani matu nanasuroi sining pattumaninnaro tudang, nanatumaningiwi mennang.

³⁸ Temmaka upe'na sining pattumaniéro rékko ripoléiwi mennang ri puwanna sadiya-sadiya mattajeng, namuni poléi ri tengnga bennié iyaré'ga lebbi tengnge'pi naiyaro!

³⁹ Engngerangngi iyaé! Akkalarapanna naissengngi punna bolaé tetté siyaga napolé pangaé, jagai matu kuwammengngi dé' nauttama pangaé ri lalempolaé.

⁴⁰ Rimakkuwannanaro harusu' tokko sadiya-sadiya, nasaba poléi matu Ana'na Tolinoé ri wettu dé'é musenna-sennai.”

Pattumani iya matinulué sibawa temmatinulué

⁴¹ Nakkutana Pétrus, “Puwang, Mupattujugi ri idi Puwang iyaro pappagguruwangngé iyaré'ga lao ri sininna tauwé?”

⁴² Nappébali Puwangngé, “Niga pattumani iya matinulué sibawa maccaé angkanna riyakka ri puwanna mancaji kapala lao risining pattumani laingngé kuwammengngi nawéréngngi nanré ri wettunna?

⁴³ Temmaka senna'na pattumaniéro rékko lisui puwanna, naripoléiwi pogau'i jama-jamanna!

⁴⁴ Ateppe'no: Iyaro puwanna nappaddettangengngi matu sininna waramparanna lao ri pattumaniéro.

⁴⁵ Iyakiya rékko makkedai iyaro pattumanié ri laleng atinna, ‘Maitta mupa nappa lisu puwakku,’ nabarasa'i sininna pattumanié enrengngé manré ménungngi gangka mabo',

⁴⁶ nanalisu matu puwanna ri esso sibawa wettu iya dé'é nasenna-sennai. Nariajara' tongeng matu iyaro pattumanié masero senna' ri puwanna enrengngé ripappada-padai totona sining tau iya dé'é namatinulu ri Allataala.

⁴⁷ Pattumani iya missengngéngngi élona puwanna, iyakiya dé' nasadiya-sadiya sibawa dé' napogau'i élona puwannaro, ribarasa'i matu sibawa maladde'.

⁴⁸ Iyakiya pattumani iya dé'é naissengngi élona puwanna, nanapogau'i iya salaé angkanna harusu'i ribarasa', ribarasa'i matu sibawa maladde'. Saba' tau iya maégaé pura riwéréngngi, maéga towi rituntukengngi matu polé ri aléna. Sibawa tau puraé ripaddettangi maéga, maéga towi rituntu' matu polé ri aléna.”

Tenniya adaméngeng iyakiya assipangéwangeng

⁴⁹ “Polé-Ka untu' paompo anré api ri linoé. Temmaka kessinna rékko malluwa'ni apinna!

⁵⁰ Engka mupa anrasa-rasang masero iya harusu'é Ujoppai. Namasussa senna' atik-Ku riwettu dé'napa nakajajiyang.

⁵¹ Muwaseggi polé-Ka untu' tiwi adaméngeng ri linoéwé? Dé', tenniya adaméngeng sangadinna appangéwangeng.

⁵² Mappammulai makkekkuwangngéwé, kaluwarga iya engkaé lima tau siéwai matu, tellu siéwa duwa, iyaré'ga duwa siéwa tellu.

⁵³ Ambo'é méwai matu ana' worowané sibawa ana' worowané méwai matu ambo'na. Indo'é méwai ana'na makkunraié sibawa ana' makkunraié méwai indo'na. Matuwa makkunraié méwai ménéttu makkunrainna, sibawa ménéttu makkunraié méwai matu matuwa makkunrainna.”

Majeppuiwi tanra-tanranna esso kiyame'

⁵⁴ Makkeda towi Yésus lao ri tau maégaé, “Rékko muwitai ménré ellungngé ri yajang, matteruko makkeda, ‘Maéloi bosi.’ Na bosi tongengngi.

⁵⁵ Rékko mupéneddingiwi angingngé polé ri yattangngi, makkedako, ‘Maéloi mapella.’ Na mapella tongengngi.

⁵⁶ Mupoji mabbonga-bonga! Mullé pattujuiwi wettu bosié iyaré'ga pellaé ri laleng makkitamu ri langié sibawa ri linoé. Magi tanra-tanranna esso kiyame' dé' mulléi péttujuiwi?”

Sidaméko sibawa balimmu

⁵⁷ “Magi natenniya alému pettuiwi aga tongengngé?

⁵⁸ Rékko engka tau mapparapekekko ri pangadilangngé, makkuragako siullé-ullému untu' puraiwi iyaro parakaraé sibawa tauwéro ri wettummu mattengnga laleng mupa. Rékko dé', nassarénréngekko matu lao ri yolona hakingngé, na hakingngé mabbéréyakko matu lao ri polisié, na polisié puttama'ko ri laleng tarungkué.

⁵⁹ Ateppe'no! Dé' mumassu matu polé ri tarungkué riwettu dé'napa muwajai iya ridendangengngékko.”