HOSEA 6 - KITTA KAREBA MADECENG

Dé' nattonget-tongeng tau Israélié toba'

¹ Makkedai sining tau Israélié, “Laono mai talisu lao ri Puwangnge. Aléna ritu peddiriki, iyakiya Alénato mappajjappa matu. Aléna palori, iyakiya Alénato bebbe'i matu sining lota.

² Ri laleng duwa iyaré'ga tellungngessoéwé napajjappaki matu, sibawa tuwoki matu ri laleng allinrungen-Na.

³ Rimakkuwannanaro laono mai tamakkuraga untu' mattonget-tongeng missengngi Puwangnge. Pasti laowi matu ri idi pada-pada apolénna éléé, sibawa pada-pada bosi iya rica'éngngi tanaé ri cappa'na wettu bare'é.”

⁴ Iyakiya makkedai Puwangnge, “Eh Israélié sibawa Yéhuda! Aga harusu Upogau' sibawa iko? Pappojimmu lao ri Iyya masitta'i teddéng pada-pada saléwué iyaré'ga cinoddoé ri éléé.

⁵ Iyanaro saba'na Usuroi nabi-nabik-Ku untu' palettukekko apettuk-Ku makkedaé harusu'ko rihukkung sibawa ripabbinasa. Iya Uwacinnaiyé polé ri iko matajanni sibawa manessa:

⁶ Lebbi Upojiwi muwissek-Ka sibawa tuli mamaséi-Ka, naiya mattunué sibawa makkasuwiyangeng akkarobangeng lao ri Iyya.

⁷ Iyakiya pada-pada Adam, muwassakkarengngi jancimmu sibawa Iyya.

⁸ Giléad iyanaritu kota iya pennoé sibawa tomaja sibawa pabbuno.

⁹ Imang-ngimangngé ri kotaéro pada-padai sikalompo makkunrai iya madangngéngngi tau iya laloé. Muwi ri laleng iya mattujué ri onrong iya mapaccingngé ri Sikhem pogau' towi mennang abbunowang! Sininna jaéro napogau'i mennang sibawa nattungkai.

¹⁰ Ri Israélié Uwitai séuwa iya mappakatau-taué: napanajisi'i aléna umma'-Ku sibawa massompa barahala.

¹¹ Passalenna iko, éh tau Yéhudaé, purani Upattette wettunna untu' hukkung tokko nasaba pangkaukemmu.”