HOSEA 5 - KITTA KAREBA MADECENG

¹ Makkedai Puwangnge, “Engkalingai, éh sining imangngé! Pénessaiwi, éh tau Israélié! Engkalingai, éh sining tau wijanna arungngé! Purani ripateppa pahukkungengngé ri yasé'mu. Saba', sitongenna harusu'ko mangadélé sibawa adélé, iyakiya sibalé'na mancajiko pada-pada jebba'é ri Mizpa, pada-pada siyo-siyoé ri Bulu Tabor,

² sibawa pada-pada kalebbong iya maliyungngé ri Sitim. Rimakkuwannanaro maélo-Ka hukkung manekko!

³ Uwisseng maneng sini-sininnaé passalenna alému, éh Israélié! Dé' namakkullé murahasiyangeng séuwa polé ri Iyya. Massompako barahala sibawa dé'na mumatinulu lao ri Iyya. Rimakkuwannanaro, sining taummu dé' nasipato'na sompa-Ka.”

Papparéngngerang passalenna assompang barahalaé

⁴ Ja iya napogau'é tau Israélié nassabariwi mennang dé' naulléi lisu lao ri Allataalana. Rikuwasaini mennang ri assompang barahalaé, angkanna mennang dé'na napaduliwi Puwangnge.

⁵ Atemponna bangsa Israélié paitai sibawa manessa, sibawa mancaji butti asalanna. Dosana mennang nassabariwi tabbuttu sibawa mabuwang, na bangsa Yéhudaé menrungngi silaong mennang.

⁶ Laowi mennang sappai Puwangnge sibawa tiwi bimbala nenniya saping untu' akkarobangeng, iyakiya iya manennaro dé' nakkéguna. Saba' risalaini mennang ri Puwangnge, sibawa dé' naulléi mennang runtu'i.

⁷ Dé' namatinulu mennang lao ri Puwangnge; ana'-ana'na mennang tenniya ana'-ana'na. Rimakkuwannanaro, dé'na namaita naripabbinasa matu mennang silaong sibawa sining dare'na.

Musué ri yelle'na Yéhuda sibawa Israélié

⁸ Seppunni tarompé'é ri Gibéa! Paoniwi tanrang pangobbi ammusurengngé ri Rama! Gorangngi kelli musué ri Bétel! Ayo, tau Bényamingngé, majuno mammusu!

⁹ Binasai matu Israélié, saba' narapini essona untu' hukkungngi aléna. Engkalingai, éh ra'ya' Israélié, pasti kajajiyangngi matu gau'éro.

¹⁰ Makkedai Puwangnge, “Macai-Ka nasaba sining pamimpinna Yéhuda purai nagasa Israélié sibawa rampasa'i tanana. Rimakkuwannanaro Upateppaiwi matu pahukkungeng mennang pada-pada lémpe'é.

¹¹ Ritenre'i Israélié; ateddéngengngi ha'na tanana, nasaba mattedde'i untu' méllau tulung lao ri iya sitongennaé dé' naulléi tulungngi.

¹² Iyanaro saba'na Uwancuru'i matu bangsa Israélié, sibawa pabbinasai tau Yéhudaé.

¹³ Namaingekini keadaanna bangsa Israélié sibawa bangsa Yéhudaé iya majaé, nalaona Israélié ri Asyur untu' méllau bantuwang polé ri arung marajaé. Iyakiya iyaro arungngé dé' naulléi mattulung iyaré'ga pédécéngiwi keadaanna mennang.

¹⁴ Pada-pada singaé palurui, makkuwaniro Ulurui matu tau Israélié sibawa Yéhudaé. Alé-Ku sapé'-sapé'i matu mennang, nainappa Usalai. Rékko Uwassarénréngengngi mennang lao, dé' muwi séddi tau mulléi paleppe'i mennang.

¹⁵ Usalaiwi matu umma'-Ku narapi mennang genne anrasa-rasanna nasaba dosa-dosana, nanapolé sappa-Ka. Naullé ri laleng anrasa-rasanna, makkuragai matu mennang runtu'-Ka.”