HOSEA 12 - KITTA KAREBA MADECENG

Ripakennainna pahukkungeng Israélié sibawa Yéhuda

¹ Makkedai Puwangnge, “Nattulilingi-Ka bangsa Israélié sibawa bellé nenniya pabengnguwang; tette'-Ka naéwa bangsa Yéhudaé, Allataala Iya Mapaccingngé sibawa matinulué.

² Sininna séuwa-séuwaé iya napogau'é tau Israélié polé ri élé narapi wenni dé' nakkéguna sibawa mappaccappui pada-pada anging alaué. Acéko-cékongngé sibawa apéddarangngé pédé tattambai ri yelle'na. Mébbui mennang assijancing-assijancing sibawa Asyur nenniya tiwii minnya lao ri Maséré selaku tanrang assisellaong.”

³ Mappunnaiwi Puwangnge parakara sibawa bangsa Yéhudaé; Nahukkung towi matu Israélié nasaba ampé-ampéna mennang. Nawale'i matu pangkaukenna mennang.

⁴ Mappammulai ri laleng parémmanang, Yakub toriyolona mennang purai nasittai Esau silessureng dénrunna; na battowanana, mallagai Yakub sibawa Allataala.

⁵ Mallagai sibawa séddi malaéka, napakalai. Nainappa teri sibawa méllau ribarakkaki. Nainappa ri Bétel, laowi Allataala ri Yakub toriyolotaro, namabbicara sibawa aléna.

⁶ Iyaro Allataala iyanaritu Puwang Iya Pommakuwasaé. Asenna iyanaritu Puwang. Nasibawang asengngénnaro napuwéloi tauwé massompa lao ri Aléna.

⁷ Rimakkuwannanaro, éh iko wijanna Yakub, ateppe'no lao ri Allataalamu sibawa lisuno ri Aléna. Tuwono sibawa penno pammasé nenniya alempureng, enrengngé tajenni sibawa sabbara narapi Allataalamu tinda.

Apettung rappina passalenna pahukkungengngé ri yasé'na Israélié

⁸ Makkedai Puwangnge lao ri bangsa Israélié, “Macéko-cékoko pada-pada tau Kanaangngé; sining padangkammu napoji belléi sining langgananna sibawa timbangang iya dé'é natongeng.

⁹ Makkedai mennang, ‘Sugiki makkekkuwangngé. Saroki! Dé' muwi séddi tau wedding tenre'ki makkedaé lolongekki asugireng secara dé' tamalempu.’

¹⁰ Iyakiya Iyya, Puwang Allataalamu, iya tiwiékko massu polé ri Maséré, mébbuko matu monro paimeng ri kéma-kémaé pada-pada riyolo wettuk-Ku lao ri iko ri padang kessi'é.

¹¹ Pura-Ka mabbicara lao ri nabi-nabié, sibawa mpéréngngi maéga pakkitang lao ri mennang. Naolai mennang Uwappaissengengngi rancana-rancana-Ku untu' iko, umma'-Ku,

¹² namuni makkuwaro engka mupa iya massompaé barahala ri Giléad, sibawa makkasuwiyangeng saping ri yasé'na mézbaé ri Gilgal. Iyakiya mennang iya massompaé barahalaro matéi matu, sibawa mézba-mézbana ri Gilgalro mancajiwi matu goppo batu risining dare'é.”

¹³ Yakub toriyolota lariwi lao ri Mésopotamia, na untu' lolongeng bainé, mancaji atai lao ri tauwé kuwaro sibawa mampii sining bimbala'na tauwé kuwaro.

¹⁴ Suroni Puwangnge séddi nabi untu' tiwii tau Israélié massu polé ri angatangengngé ri Maséré, sibawa untu' jagaiwi mennang.

¹⁵ Purani naébbu tau Israélié macai senna Puwangnge; sipato'i mennang rihukkung nasaba jana. Puwangnge hukkungngi matu mennang nasaba purai mennang Naébbu tauwé pakatunai.