HAKING-HAKING 18 - KITTA KAREBA MADECENG

Mikha sibawa suku Dan

¹ Iyaro wettué ri Israélié dé'gaga arung. Suku Dan sappa-sappa mupi daéra untu' mancaji daérana mennang, saba' dé'topa mennang nalolongeng tana silaong suku-suku laingngé ri laleng bangsa Israélié.

² Rimakkuwannanaro, piléni mennang lima tau iya poré polé ri yelle'na sininna appangngé ri laleng sukunna mennang iya monroé ri Zora sibawa Esytaol, nainappa nawéréng jamang iya lima tauwéro untu' salidikiwi wanuwaéro. Najoppana sining tauwéro, nalettu'na ri daéra buluna Efraim. Kuwaniro mennang mappéruma ri bolana Mikha.

³ Wettunna maélo muttamakiwi iyaro bolaé naéngkalingani mennang iyaro kallolo Léwié mabbicara, nanarupaiwi lagunna. Jaji, nalokkaini sibawa makkutana, “Magako kuwaé? Aga urusammu? Niga tiwiko?”

⁴ Nappébali iyaro tau kalloloé, “Engkaka kuwaé nasaba Mikha. Aléna ritu makkaka mancaji imanna, sibawa mpérékka gaji.”

⁵ Namakkeda mennang lao ri aléna, “Rékko makkuwaitu, tulung akkutanangngi ri Allataala aga iyaé allalengetta papolé matu wassélé iyaré'ga dé'.”

⁶ Nappébali iyaro imangngé, “Aja' mubata-bata. Puwangnge pura barakkakiwi allalengemmu.”

⁷ Purairo joppani iya lima tauwéro nanalao ri Lais. Kuwaniro napénessai pabbanuwana. Manessani makkedaé cara atuwo-tuwonna iyaro pabbanuwana Lais pada-pada cara atuwonna bangsa Sidongngé. Namuni mennang massala, sibawa mabéla polé ri bangsa Sidongngé, tuwoi mennang amang sibawa damé, dé' nappunnai bali, macommo, enrengngé dé' naakurangeng muwi séuwa aga.

⁸ Wettunna iya lima tauwéro lisu lao risining sukunna ri Zora sibawa Esytaol, riyéllauni mennang mabbéré laporang.

^9-10 Makkedani mennang, “Laono mai taluruiwi Lais. Poléki kuwaro, sibawa mitai makkedaé makessing tanana, malowang sibawa macommo, engka maneng sini-sininnaé. Aja' mutette bawang kuwaé sibawa dé' aga-aga mupogau'. Asitta'no lao kuwaro sibawa sittaiwi wanuwaéro. Mupoléiwi matu makkedaé pabbanuwana dé' sises-siseng nasenna-sennai maéloi rigasa. Mateppe'ki Allataala pura mabbéréyangngi wanuwaéro lao ri iko.”

¹¹ Rimakkuwannanaro, joppani polé ri Zora sibawa Esytaol 600 tau suku Dan. Sibawa senjata sukku,

¹² laoni mennang ri bagiyang yajanna Kiryat-Yéarim ri daérana Yéhuda nainappa makkéma kuwaro. Iyanaro saba'na nariyaseng mupi iyaro onrongngé Akkémanna Dan.

¹³ Polé kuwaro joppani mennang matteru ri daéra buluna Efraim lettu ri bolana Mikha.

¹⁴ Makkedani iya lima tau mata-mata risuroé riyoloro lao ri sellao-sellaona, “Muwissegga makkedaé risala séddinna bolaéwé engka dato'-dato' mallapi péra'? Engkato dato'-dato' laing sibawa éfod. Coba pikkiri'i aga harusu tapogau'.”

¹⁵ Nainappa mennang lao ri bolana Mikha, onronna kallolo Léwiéro monro, sibawa makkutanangngi keadaanna.

¹⁶ Iyaro wettué iya enneng ratuna prajuri suku Dan, iya massenjata sukkuéro, mattengngangngi tettong ri yolona pintu gerbangngé.

¹⁷ Iya lima mata-mataéro matteruni muttama ri lalempola, nanalai dato'-dato' aju iya mallapi péra'éro silaong dato'-dato' laingngé sibawa éfod. Iyaro kallolo Léwié mattengngangngi tettong silaong iya enneng ratuna prajuri'éro ri pintu gerbangngé.

¹⁸ Wettunna iya lima tauwéro muttama ri bolana Mikha sibawa malai éfod-é silaong dato'-dato' barahalaéro, makkutanani iyaro kallolo Léwié, “Aga iyaé mupogau'?”

¹⁹ Nappébali mennang, “Ammekkoko! Aja' muwakkutana. Accowé bawanno ri idi, mancajipo matu imatta sibawa pappangajata. Lebbi kessing muwi mancaji imang untu' séddi suku naiya mancaji imangngé untu' séddi kaluwarga bawang!”

²⁰ Masennanni iyaro kallolo Léwié sibawa tangngaéro. Jaji, nalani éfod-é sibawa dato'-dato' barahalaéro nainappa maccowé silaong mennang.

²¹ Nainappa napatteru mennang joppana iyaro rombangangngé, ripoddiyoloi ri ana'-ana'é, olokolo'é sibawa barab-baranna mennang.

²² Wettunna mennang mabélani, naobbini Mikha bali-bali bolana nainappa silaong lellungngi iyaro sining tau suku Dangngé. Macawé'nana ri mennang,

²³ gora-gorani Mikha sibawa sining taunna lao ri mennang. Iyaro sining tau suku Dangngé gilinni sibawa makkutana lao ri Mikha, “Engka aga? Magi mupolé sibawa maéga makkuwaro tau?”

²⁴ Nappébali Mikha, “Mulariyangngi dato'-dato'ku sibawa imanna, angkanna dé'na uwappunnai aga-agana, nainappako makkeda, ‘Engka aga!’ ”

²⁵ Nakkeda iyaro sining tau suku Dangngé, “Lebbi kessing muwi mututu témummu; aja' narapii iyaé sining tauwé macayii nanaluruiko. Mumaté matti silaong sininna kaluwargamu.”

²⁶ Purana makkeda makkuwaro, iyaro sining tau suku Dangngé napatteruni joppana mennang. Naitani Mikha makkedaé mabélai lebbi watanna mennang, rimakkuwannanaro balé'ni nanalisu.

^27-28 Puranana iyaro sining tau duku Dangngé nalariyang iyaro imangngé nenniya iyaro barab-barang assompang ébbuna Mikha, laoni gasai Lais, kota iya pabbanuwanaé tuwo amang sibawa masennang. (Iyaro kotaé engkai ri laleng séddi lompo sibawa kota Bét-Réhob.) Iyaro sining tau Dangngé naunoni sininna pabbanuwana Lais nainappa natunu kotaéro. Dé'gaga polé tulungngi iyaro sining tau Lais-é nasaba onronna mennang massalai sibawa mabélai polé ri Sidon. Purairo, iyaro sining tau Dangngé napatettonni paimeng iyaro kotaé nainappa monro kuwaro.

²⁹ Asenna iyaro kotaé nasulléiwi mennang mancaji Dan, situru asenna toriyolona, iyanaritu Dan, ana'na Yakub.

³⁰ Dato'-dato' barahala iya natiwié mennanro, napatettonni ri kotaéro nainappa nakka Yonatan, ana' Gérsom, eppona Musa, mancaji imanna. Iyaé wijanna Gérsom tette'i mancaji imanna suku Dan narapi wettunna umma Israélié ripali ri wanuwa-wanuwa laingngé.

³¹ Iyaro dato'-dato' barahala ébbuna Mikha tette'i ri Lais ri wettu engkana mupa Kémana Puwangnge ri Silo.