HAKING-HAKING 13 - KITTA KAREBA MADECENG

Ajajiyanna Simson

¹ Madosasi tau Israélié lao ri Puwangnge, nainappa Puwangnge leppessangngi tau Filistingngé kuwasaiwi mennang patappulo taung ittana.

² Ri wettuéro engka séddi tau worowané ri kota Zora. Asenna Manoah, polé ri suku Dan. Bainéna manangngi.

³ Iyakiya riséuwaé esso nappaitangngi aléna malaéka'na Puwangnge lao ri aléna sibawa makkeda, “Ri wettu labe'é dé' muwulléi mappunnai ana', iyakiya dé'na namaittana namuwattampu matu, sibawa lolongeng séddi ana' worowané.

⁴ Rimakkuwannanaro jagaiwi alému madécéd-décéng. Aja' muwénung anggoro iyaré'ga énungeng maseri, iyaré'ga manré séuwa iya harangngé.

⁵ Jajinna iyaro ana'mu, aja' sises-siseng murette'i gemme'na, saba' mappammulai ri laleng parémmanang pura ripattentuni untu' mancaji tau nazir. Aléna ritu matu méwa untu' paleppe'i bangsa Israélié polé ri akuwasanna tau Filistingngé.”

⁶ Purairo laoni bainéna Manoah ri lakkainna sibawa makkeda, “Daéng, engka surona Allataala lao ri iyya; tappana pada-pada malaéka'na Allataala, angkakku métau. Dé' uwakkutanangngi polé kégi, na aléna dé'to nappaissengengngi asenna lao ri iyya.

⁷ Iyakiya makkedai makkedaé mattampu'ka matu sibawa lolongeng séddi ana' worowané. Makkeda towi makkedaé dé' naweddikka ménung anggoro iyaré'ga énungeng maseri, iyaré'ga manré séuwa iya harangngé, saba' iyaro ana'é harusu'i riyabbéréyang lao ri Allataala untu' mancaji séddi tau nazir gangka tuwona.”

⁸ Naéngkalinganaro, massempajanni Manoah lao ri Puwangnge, makkuwaé, “Puwang, Tasuroi paimeng atammuro lao ri idi untu' mappaissengengngi aga iya harusu'é ripogau' sibawa ana'éro rékko jajini.”

⁹ Naéngkalingai Allataala paréllaunna Manoah. Poléni paimeng iyaro malaéka'na Puwangnge wettunna bainéna Manoah tudat-tudang ri dare'é. Iyaro wettué dé'i gaga lakkainna kuwaro.

¹⁰ Jaji larini paissengiwi gau'éro, “Daéng, itani, tau iya polé riyolo ri iyya'ro, polési!”

¹¹ Masittani Manoah maccowériwi bainéna. Naddeppérini iyaro tauwé sibawa makkutana, “Puwagga tiwi karéba ri bainéku?” “Tongeng,” pappébalinna.

¹² Namakkutana Manoah, “Rékko aga iyaro napowadaé Puwang kajajiyanni matti, aga harusu napogau' iyaro anana'é? Pékkugi atuwonna matti?”

^13-14 Nappébali iyaro malaéka'na Puwangnge, “Dé' nawedding bainému ménung anggoro iyaré'ga énungeng maseri, makkuwatoro dé' nawedding manré iya assalennaé polé ri pong anggoro'é, iyaré'ga séuwa iya harangngé. Harusu'i napogau' maneng sininna iya puraé upowadangngi, sibawa jagaiwi kuwammengngi dé'gaga iya dé'é napogau'i.”

¹⁵ Nanakkeda Manoah lao ri Aléna, “Tatajenni cinampe Puwang. Maéloki mannasu bémbé lolo riyolo untu' Puwang.”

^16-17 Iyakiya makkedai iyaro malaéka'na Puwangnge, “Namuni mattajekka kuwaé, dé'to uwanréi matu aga iya mupatalaéro matti. Iyakiya, rékko maélo muko patalai, patalai iyaro selaku akkarobangeng ritunu, sibawa akkasuwiyangengngi lao ri Puwangnge.” Dé'pa namaingekiwi Manoah makkedaé iya mabbicaraé sibawa alénaro iyanaritu malaéka'na Puwangnge. Jaji makkedai, “Rékko makkuwaitu, tapaissengina asenna Puwang, kuwammengngi rékko aga iya napowadaéro Puwang kajajiyanni matti, weddikki pakalebbii Puwang.”

¹⁸ Nakkutana iyaro malaéka'na Puwangnge, “Aga saba'na mumacinna missengngi asekku? Iyaro asekku aseng iya makalallaingngé.”

¹⁹ Nanaalana Manoah sikaju bémbé lolo sibawa céddé gandong, nanataroi ri yasé'na batué nanakkasuwiyangengngi lao ri Puwangnge, iyanaritu Puwang iya pogau'éngngi gau'-gau' iya makalallaingngé.

^20-21 Ri wettu malluwa'na mupa apié liyasé polé ri mézbaéro, naitani Manoah sibawa bainéna iyaro malaéka'na Puwangnge ménré liyasé ri laleng luwa apiéro, mattuju ri langié. Nappai namaingeki Manoah makkedaé iyaro malaéka'na Puwangnge; nanasuju'na sibawa bainéna massompa. Dé'na naengka naitani iyaro malaéka'é.

²² Nanakkeda Manoah lao ri bainéna, “Pasti matéki matu saba' puraki mitai Allataala!”

²³ Nappébali bainéna, “Rékko mémeng maéloi Puwangnge mpunoki, pasti dé' Namaélo tarimai akkarobangeng iya riyakkasuwiyangengngé lao ri Alénaro; sibawa dé'to Namaélo mappaitang manengngi iyaé lao ri idi iyaré'ga mappaissengengngi gau'-gau' iya puraé Napowada lao ri idi.”

²⁴ Siyagangngaré uleng ri munrinna iyaro bainéna Manoah jajiyanni séddi ana' worowané nanawéréngngi aseng Simson. Iyaro ana'é mancaji battowani enrengngé ribarakkaki ri Puwangnge;

²⁵ na wettunna engkai ri akkémanna suku Dan, iya engkaé ri pallawangenna Zora sibawa Esytaol, mammulani Rohna Puwangnge mpéréngngi awatangeng.